Ýnıversıada qarsańynda jańartylǵan navıgasııa júıesi engizildi

Almatyda 2017 jylǵy Dúnıejúzilik qysqy ýnıversıada qarsańynda qosymsha 300-den astam aqparattyq-kórsetkish jol belgileri ornatylǵan, dep jazady Ýnıversıadanyń resmı saıty. Ýnıversıada dıreksııasy habarlaǵandaı, sport nysandary jáne olarǵa kólik qozǵalysynyń baǵdarlary týraly aqparat jeke jobalaý belgilerinde qazaq, orys jáne aǵylshyn tilderinde kórsetilgen. Jol belgileriniń dızaıny ótkiziletin jarys túrleri boıynsha sport nysandarynyń baǵdarlamalary men jarystardyń bekitilgen logotıpin qamtıdy. Baǵdar boıynsha beıimdelý belgileri sport qurylystaryna, kólik ınfraqurylymy nysandaryna (t/j vokzaldary jáne «Almaty» halyqaralyq áýejaıy), Ýnıversıada sportshylary men qonaqtary demalatyn jáne turatyn oryndarǵa ótýdiń ońtaıly baǵdarlarynda ornalasqan. Sondaı-aq navıgasııa júıesine Almaty qalasynyń medısınalyq mekemeleri kirdi. Boljamdarǵa sáıkes, Ýnıversıadaǵa qatysýshylardyń 90%-y Almaty qalasynyń halyqaralyq áýejaıyna tikeleı áýe reısterimen keledi. Budan bólek, qaýipsizdikti qamtamasyz etý úshin, Momyshuly kóshesinde, «Almaty Arena» sport kesheniniń ońtústigine qaraı baǵdarsham nysany ornatylǵan. «Almaty Arena» sport nysanynyń soltústigine qaraı bos oryndardyń bar ekeni týraly aqparattandyratyn elektrondy tablomen jaraqtandyrylǵan qosymsha avtoturaq daıyndalǵan.