Aqtóbede «Týǵan jerge taǵzym» aksııasy qorytyndylandy

Aqtóbe oblysy ákimdiginde «Týǵan jerge taǵzym» aksııasy aıasynda atqarylǵan jumystar qorytyndylandy, dep habarlaıdy QazAqparat. Bul shara óńir basshysy Berdibek Saparbaevtyń bastamasymen qolǵa alynǵan bolatyn. Sharanyń aıasynda 817 mln. teńgege 560 joba júzege asyrylǵan. Oǵan aımaqtaǵy kásipkerler tartylǵan. Mysaly, bıznesmenderdiń bireýleri óz qarajatyna mektepke jóndeý jasasa, ekinshileri joldardy jóndep, kópirler salyp, oqý ǵımarattarynyń materıaldyq-tehnıkalyq qoryn jańalaýǵa atsalysty. Munyń barlyǵy bıýdjetten tys qarajatqa atqarylǵan dúnıeler. Degenmen, oblys ákimi Berdibek Saparbaev osy baǵytta júrgizilip jatqan jumystar áli de álsiz júrgizilip jatqandyǵyn aıtady. Oblystaǵy qaıyrymdy jandardyń kómegimen budan da zor áleýmettik máselelerdi sheshýge bolatynyn aıtqan ol, osy baǵyttaǵy jumystardy ári qaraı jaqsarta túsýdi aýdandarǵa tapsyrdy. -О́kinishke qaraı, bul aksııada buqaralyq sıpat joq. Jobalar joq emes, alaıda olardyń kólemi shaǵyn. Al bizge iri jobalar qajet. Tirek eldi mekenderine týǵan aýylynyń damýyna úles qosyp, ózi oqyǵan mektebine barlyq qoldan kelgen kómegin kórsetetin kásipkerlerdi bekitý qajet. Buǵan qosa aksııanyń tárbıelik máni de bar. Ár azamat týyp-ósken jerin umytpaýy tıis,-dedi Berdibek Saparbaev.