Tasmaǵambetov: Ýnıversıada kezinde 3 máseleni erekshe baqylaý kerek

28-shi Búkilálemdik qysqy Ýnıversıada kezinde Almaty turǵyndarynyń kúndelikti túrmysyna kedergi kelmeýi kerek. Bul týraly búgin QR Úkimetiniń selektorlyq rejimdegi otyrysynda Premer-Mınıstrdiń orynbasary Imanǵalı Tasmaǵambetov aıtty. «Elimizde alǵash ret ótetin Ýnıversıadaǵa da sanaýly ǵana ýaqyt qaldy. Osydan onshaqty kún buryn Almaty qalasynda meniń tóraǵalyǵymmen uıymdastyrý komıtetiniń sońǵy májilisi ótti. Sonda jaýapty azamattar jalpy osy kezeńge deıin josparlanǵan sharalardyń barlyǵy atqarylǵandyǵyn aıtyp berdi. Endigi úlken mindet - osynaý aýqymdy halyqaralyq sharany joǵary deńgeıde ótkizý. Búgingi Úkimettiń keńesin paıdalanyp, 3 erekshe baqylaýda turatyn máselege nazar aýdarǵym keledi», - dedi ol. Osy rette Tasmaǵambetov qaýipsizdik máselesin aıryqsha nazarda ustaý qajettigin basa aıtty. Mınıstr myrza (Ishki ister mınıstri Qalmuhanbet Qasymov - red.) daıyndyq máselesi jóninde aıtyp berdi. Biraq qaýipsizdik, tártip saqtaý máselelerine, sondaı-aq sanıtarlyq-epıdemıologııalyq, medısınalyq máselelerge de qatty kóńil bólý kerek sııaqty. О́ıtkeni, kóp qonaq kelmekshi», - dedi Úkimet basshysynyń orynbasary. Onyń basa nazar aýdarǵan ekinshi máselesi kóliktik-logıstıka salasy boldy. «Áýejaı qyzmetinen bastap Almaty qalasynyń aýmaǵynda sportshylar men qonaqtardyń qatynaýyna deıin, sonymen qatar qonaqtardy tasymaldaý máselesi Almaty qalasynyń turǵyndarynyń kúndelikti turmysyna kedergi keltirmeýi tıis. Bul máseleni biz komıssııanyń otyrysynda da talqylaǵan bolatynbyz. Bul másele jónindegi jospar qalalyq ákimdikte bar. Biraq, nazarda bolýy kerek dep esepteımin»,-  dedi ol. Úshinshiden, kommýnaldyq qyzmetterdiń naqty jáne úılestirilgen jumysy bolýy tıistigin atap ótti. «Qańtar aıynyń aıaǵynda Almaty qalasynda qysqy mezgildegi qardyń qalyń túsetini belgili. Osyǵan baılanysty tıisti qyzmetter arnaıy jumys rejimine kóshýi qajet. Soynmen qatar apatty qyzmetterdiń, onyń ishinde energetıka, jylý jáne sýmen qamtamasyz etý salalarynyń ázirlengen jumysyn qamtamasyz etý qajet. Mine osy úsh máselege kóńil aýdarý qajet dep esepteımin»,-  dedi Tasmaǵambetov.