Ýnıversıadaǵa ótinish bergen 60 eldiń 57-si akkredıtasııany aıaqtady

Ýnıversıadaǵa ótinish bergen 60 eldiń 57-si akkredıtasııany aıaqtady. Bul týraly búgin Úkimet otyrysynda Almaty qalasynyń ákimi Baýyrjan Baıbek qalanyń búkilálemdik qysqy Ýnıversıadaǵa daıyndyǵyn baıandaý barysynda málimdedi. Onyń aıtýynsha, bul qysqy Ýnıversıada tarıhyndaǵy rekordtyq kórsetkish. "35 memleket 25 paıyzdyq kepildik jarnany tólep qoıdy. 45 memlekettiń sportshylary men qonaqtar vızasyz kiredi, qalǵan 12 komanda vızany jeńildetilgen tártippen alady", - dedi Baýyrjan Baıbek. Onyń aıtýynsha, barlyq jańa nysandar paıdalanýǵa berildi. Qalǵan nysandardy jańǵyrtý jumystary aıaqtaldy. «20 qańtarda atletıkalyq aýyl 100 paıyz daıyn bolady. Qatysýshylar 23 qańtardan bastap kele bastaıdy. 26 qańtar kúni 24 eldiń sportshylary keledi. Barlyǵy 2200 atlet pen olardyń janynda myńnan astam adam bolady. Atletıkalyq aýyldyń meri bolyp Serik Sápıev taǵaıyndaldy. Ýnıversıadanyń aldynda Almaty áýejaıy men vokzaldardyń bezendirilýi men servısi jaqsartyldy. Barlyq máseleler sheshildi. Sondaı-aq qonaqúıler men dámhanalar, meıramhanalar tekserildi. Almatynyń týrıstik kartalary, ýnıversıada kartalary ázirlendi. Áýejaıda jaqynda ınteraktıvtik týrıstik-aqaparattyq ortalyq iske qosylady», - dedi ol. Qalalyq jedel shtab qurylǵan. Ol táýlik boıy jumys isteıtin bolady. Qaýipsizdikti IIM, Ulttyq ulan, Qorǵanys mınıstrliginiń 7 myńnan astam qyzmetkeri qamtamasyz etpek. «Jalpy, ótken jyly ishki ister departamentiniń materıaldyq-tehnıkalyq bazasyn jaraqtandyrýǵa jergilikti bıýdjetten 2,5 mlrd teńge bólindi. Bıylǵy jyly «EKSPO-2017» kórmesin ótkizýge baılanysty IID bıýdjeti taǵy 25 paıyzǵa artyp, 17,3 mlrd teńgeni quraıdy. Jalpy alǵanda, barlyq quqyq qorǵaý organdarynyń ózara yntymaqtastyǵy jolǵa qoıyldy», - dedi Baıbek. Baıbek qala turǵyndary men qonaqtaryna yńǵaıly bolý úshin oqýshylarǵa qosymsha demalys berý sheshimi qabyldanǵanyn jetkizdi. Bul kóshelerdi 30 paıyz bosatýǵa jáne oqýshylar men ata-analarǵa Ýnıversıada aıasyndaǵy jarystardy kórýge múmkindik beredi. Qala basshysy kommýnaldyq qyzmetterdiń tolyqqandy daıyn ekenin de jetkizdi. Budan bólek, bul kúnderi sporttyq sharalarmen qatar, 40-tan astam mádenı is-sharalar da josparlanǵan. Esterińizge sala ketsek, búkilálemdik qysqy Ýnıversıada Almaty qalasynda 29 qańtar men 8 aqpan aralyǵynda ótedi.