Ýnıversıadaǵa BAQ ókilderin tirkeý rásimi tolyq aıaqtaldy

Ýnıversıadaǵa BAQ ókilderin tirkeý rásimi tolyq aıaqtaldy. Bul týraly búgin QR Úkimetiniń selektorlyq rejimdegi otyrysynda elimizdiń Aqparat jáne kommýnıkasııalar mınıstri Dáýren Abaev aıtty. «Barshańyzǵa málim, 25 qańtarda elordada Ýnıversıada alaýy jaǵylady. Mınıstrlik bul sharany jurtshylyq nazaryna keńinen usynýdy josparlaýda. Oǵan «Qazaqstan» jáne «Habardyń» Astana men Almatydaǵy jáne oblystardaǵy barlyq tehnıkalyq resýrstary tartylatyn bolady», - dedi Abaev. Sonymen qatar mınıstr Ýnıversıadany aqparattyq qoldaý jumystaryna toqtaldy. «Aqparat jáne kommýnıkasııalar mınıstrligi Ýnıversıadany aqparattyq turǵydan qoldaý jumystaryn arnaıy medıa josparǵa saı jalǵastyrýda. Jospar aıasynda elimizdiń barlyq memlekettik aqparat quraldarynda atalǵan sharaǵa qatysty materıaldar júıeli túrde jaryq kórýde»,- dedi ol. Mınıstrdiń aıtýynsha, bul jumystarmen respýblıkalyq teleradıolar, gazet-jýrnaldar men ınternet resýrstar jáne tutas óńirlik mass-medıa qamtylyp otyr. Esterińizge sala ketsek, 28-shi Búkilálemdik qysqy Ýnıversıada 2017 jyldyń 28 qańtary men 8 aqpany aralyǵynda Almaty qalasynda ótedi.