Sońǵy 3 jylda «Qazaqfılmniń» 75 kartınasy álemdik prokatqa usynyldy

Sońǵy úsh jylda aýqymdy álemdik prokatqa «Qazaqfılmniń» 75 kartınasy usynyldy. Olardyń barlyǵy qazaqstandyq kınematograftyń múmkindikterin barynsha kórsete aldy. Bul týraly búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda mádenıet jáne sport mınıstri Arystanbek Muhamedıuly málimdedi. Úkimet otyrysy barysynda sondaı-aq otandyq kınoóndirýshilerge qoldaý kórsetýdiń negizgi joldary men Kınematografııany damytý tujyrymdamasynyń jobasy qarastyryldy. Arystanbek Muhamedıulynyń aıtýynsha, Qazaqstanda sońǵy jyldary ishki naryqta ǵana emes, álemdik naryqta da suranysqa ıe tabysty fılmder qatary tolyqty. Olardyń ishinde ótken jylǵy reseılik jáne qazaqstandyq prokatta kóshbasshy bolǵan «28 panfılovshy» fılmi, premeralyq kórsetilimi Reseı, Qytaı, Fransııa, Gonkong, Grekııa elderinde ótken «Kóshbasshy joly» kınoepopeıasynyń besinshi bólimi – «Juldyzdar toǵysqanda» fılmi, Aqan Sataevtyń «Anaǵa jol» kartınasy bar.