Roze: Golovkınniń burynǵy qarsylastary rıngke shyqpaı jatyp jeńiletin

Amerıkalyq boksshy Dennıel Djeıkobstyń bapkeri Andre Roze shákirtiniń isik aýrýyna shaldyqqany jóninde aıtyp berdi. Bul týraly sports.kz habarlady. «Dennıdiń aýyryp júrgen kezdegi túrin kórseńizder. Beıne bir jany joq adam sııaqty nemese jurttyń aıtyp júrgen qorqynyshty Frankshteıni me dep qalar edińizder. Hımııaterapııadan shyqqannan keıin 225 fýntqa deıin tolyp ketti», – deıdi Roze. «Dál mundaı qaýipti dertke shaldyqqandardyń jazylyp ketýi ekitalaı. Áli kúnge deıin kóz aldymnan onyń aýrýhana tósegine tańylyp jatqany ketpeıdi. Týǵan ulymnan aıyrylardaı kúıde júrdim. Biraq ol jazylyp ketetinine senimmen qarap, jaqsylyqtan úmittenýmen boldy», – dedi jattyqtyrýshysy. «Ádettegideı jattyǵý zalyna kelgenimde shákirtterimniń biri Dennıdiń kelgenin aıtty. Tańyrqaǵanymdy jasyra almaı, «Qaı Dennı?» dep surappyn. Men joqta kelip, azdaǵan daıyndyq jasapty», – dedi Andre. Al Djeıkobs aýrýhanadan jazylyp shyǵyp, jattyǵýǵa qaıta oralǵanyn bylaısha aıtyp berdi: «Qaterli dertten jazylyp kelip, alǵash ret sparrıng ótkizgenmin. Sol kezde tipti, salmaǵy nebári 140 fýnt bolatyn Shemýel Peıgannyń soqqylary menen aýyr kórindi. Sol kúnnen keıin boksqa qaıta oralǵanym durys pa degen de oıda qaldym. Biraq naǵyz jekpe-jekte jeńiske jetkenimde sharshy alańǵa ne úshin oralmaımyn dep ózime jiger berdim», – dedi ol. Andre Roze óz shákirtiniń dál osy minezi Golovkınniń burynǵy qarsylastarynan erekshelenetinin aıtty. «Golovkınniń buǵan deıingi qarsylastarynyń bári rıngke shyqpaı-aq psıhologııalyq turǵydan jeńilip jatady. Biraq Djeıkobstan ondaı álsizdikti kútpeı-aq qoıyńyzdar», – dedi bapkeri.