Astanada jaryqtandyrýdyń «aqyldy» júıesi iske qosylady

Astanada jaryqtandyrýdyń «aqyldy» júıesi iske qosylady, dep habarlady elorda ákimdiginiń baspasóz qyzmeti. Astana kósheleriniń erekshe jobasy "Astana Innovations" AQ kompanııasymen ázirlendi. Joba jaryqdıodty shamdar ornatý men kósheni jaryqtandyrýdyń «aqyldy» júıesine kóshý arqyly energııa únemdeýdi arttyryp, oǵan jumsalatyn shyǵyndardy azaıtýdy kózdeıdi. Joba aıasynda natrıı shamdardy zamanaýı jaryqdıodty shamdarǵa almastyrý josparlanǵan. Qýattylyǵyn retteýge bolatyn shamdardyń jalpy sany 25 myńnan kem bolmaıdy. Jobaǵa 4 mlrd teńge kóleminde ınvestorlardyń qarjysy tartylmaq. Astanalyq kommýnaldyq sharýashylyq basqarmasy jeke áriptesterdi tartý boıynsha baıqaý jarııalaý úshin qajetti qujattar ázirleýde. Joba avtorlary kóshelerdi jaryqtandyrýǵa jumsalatyn elektr energııasyn paıdalanýdy shamamen 50 paıyzǵa azaıtyp, aqyldy júıeniń kómegimen shamdardy qoldanýǵa jumsalatyn qarajatty qysqartady dep otyr. Sondaı-aq kóshelerdi jaryqtandyrý baǵanalarynda «Zattar Interneti (IoT)» «aqyldy» servısi engizilmek. Bul servısti iske asyrý ózge eseptegishterden málimetter jınaý úshin biryńǵaı  symsyz júıe, aqparattyq keste, avarııalyq kómek túımesi (SOS), fotobeınetirkeý, kólik quraldary aǵynyn monıtorıngteý, qorshaǵan ortany monıtorıngteý jáne baqylaý, Wi-Fi syndy servısterge qol jetkizýge múmkindik beredi. Osylaısha, qalany jaryqtandyrý men qosymsha servıster bul jobany Smart Astana jalpyqalalyq jobasynyń negizgi baǵyttarynyń biri eteri sózsiz. Astana innovations kompanııasynyń mamandarynyń aıtýynsha, joba bıyl iske qosylady. Baıqaý qorytyndysy boıynsha ınvestormen memlekettik – jeke menshik áriptestik jónindegi kelisim-shartqa qol qoıylmaq.