Jańa aýrýhana jumysyn bastady

Jańa jyldyń aq tańy elimizdiń batys qaqpasynyń turǵyndaryna óz jaqsylyǵy men qýanyshyn ala keldi. Iаǵnı, bıylǵy qańtar aıynyń alǵashqy kúnderinde Oralda kóp beıindi qalalyq aýrýhana óz qyzmetin bastady. Osy arqyly Aqjaıyq aımaǵynda turǵyndarǵa medısınalyq qyzmet kórsetý isi jańa sapalyq deńgeıge kóterildi deýge tolyq negiz bar. Sonymen birge, qalalyq mártebeni ıelengen jańa emdeý ornynyń ashylýy oblystyq aýrýhanaǵa túsip kelgen júktemeni ájeptáýir azaıtqany da basy ashyq aqıqat. Sońǵy jyldary óńirde den­saýlyq saqtaý mekemeleri keńeıe túsýde. Degenmen, «bul án buryńǵy ánnen ózgerek» degendeı, jańa kóp beıindi aýrýhananyń orny múldem bólek desek artyq aıtqandyq bolmaıdy. Respýblıkalyq bıýd­jettiń esebinen boı kótergen sándi de sáýletti aýrýhananyń paıdalanýǵa berilýi Elbasy saıasatynyń basym baǵyttarynyń biri – ult densaýlyǵyna qamqor­lyqtyń basty bir kórinisi. Onyń qurylysyna jáne qazirgi zamanǵy medısınalyq qural-jabdyqtar  ornatýǵa 8 mıllıard 300 mıllıon teńge qara­jat jumsalǵan. Atalǵan medı­sınalyq qondyrǵylar Reseı­­diń jáne Germanııa men Japo­nııanyń jetekshi fırmalarynan jetki­zilgen. Syńǵyrlaǵan sý jańa aýrýhanada júıke-ınsýlt ortalyǵy, jalpy terapııa, travmatologııa, gınekologııa, kardıologııa, ota jasaý jáne jan saqtaý bólimderi bar. Sonymen birge, pýlmonologııa, sáýleli dıagnostıka jáne rentgen kabınetterine de eń ozyq zamanaýı qondyrǵylar qoıylǵan. Kirse shyqqysyz ǵımarat segiz negizgi jáne bes kómekshi korpýstardan turady. Kóp beıindi qalalyq aýrýhanaǵa bir mezgilde 300 adam ornalasyp, em qabyldaı alady. Mundaǵy qyzmet oryndarynyń bári avtomatty júıege qosylǵan. Jańa klınıka ujymy tolyq jasaqtalǵan. Munda shtat kestesi boıynsha 140 dáriger jáne 300-den astam orta deńgeıdegi medısına qyzmetkerleri óz qyzmet­terine kiristi. Tutastaı alǵanda, búginde elimizde densaýlyq saqtaý salasyndaǵy basty prob­le­malarynyń biri – dáriger kadrlardyń jetispeýi desek qatelespeımiz. Osyndaı kezde elimizdiń batys óńirindegi ja­ńa qalalyq aýrýhanada bul máseleniń tolyq sheshimin tapqa­ny taǵy bir mereı. Munda óz qyzmetterin bastaǵan dárigerlerdiń denin shet­elderde jáne respýb­lıka­myzdyń eń úzdik klınıkalary men joǵary medısınalyq oqý oryndarynda tájirıbeden ótkender quraıdy. Olardyń arasynda «Bolashaq» baǵdarlamasy arqyly shetelderde bilim alǵan jas mamandar da bar dedi gazet tilshisine Batys Qazaqstan oblystyq densaýlyq saqtaý basqarmasynyń basshysy Hamı­dolla Irmenov. Oral óńirindegi kóp beıindi qalalyq aýrýhana myńǵa jýyq adamdy turaqty jumyspen qamtyǵan. Temir QUSAIYN, «Egemen Qazaqstan» ORAL