Joǵarǵy sotta «Zańdylyq» atty sot pen prokýratýranyń aqparattyq-taldamalyq júıesiniń jobasy tanystyryldy
Joǵarǵy sot Tóraǵasy Qaırat Mámı men Bas prokýror Jaqyp Asanov «Zańdylyq» atty sot pen prokýratýranyń aqparattyq-taldamalyq júıesi jobasynyń tanystyrylymyna qatysty, dep habarlady Joǵarǵy sot pen Bas prokýratýranyń baspasóz qyzmetteri.
Kezdesýge Qazaqstandaǵy qylmystyq sot tóreligin jetildirý jónindegi Eýropalyq odaq jobasynyń ókilderi, beınebaılanys arqyly – óńirlik sýdıalar men prokýrorlar qatysty.
Kezdesýdi asha kele, Qaırat Mámı sot tóreligin júzege asyrý prosesine aqparattyq tehnologııalardy engizý sot qorǵaýyna qoljetimdilikti aıtarlyqtaı jeńildetetinin, biryńǵaı sot praktıkasyn qalyptastyryp, quqyqtyq aıqyndylyq qaǵıdatyn qamtamasyz etýge yqpal etetinin aıta kele, «Jańa elektrondy servısterdiń arqasynda biz azamattardy «sot satylary boıynsha artyq júrýden» qutqardyq. О́tken jyly «Sot kabıneti» arqyly sottarǵa 756 435 elektrondy qujat kelip tústi. Osy joly tanystyrǵaly otyrǵan «Zańdylyq» júıesi qylmystyq proseske «aqyldy tehnologııalardy» engizýdegi kezekti qadam bolyp tabylady. Bizdiń basty maqsatymyz – turǵyndar úshin jeńil ári yńǵaıly quraldar qurý», – dedi.
Kezdesýde sóılegen sózinde Jaqyp Asanov Bas prokýratýranyń jańa ınnovasııalyq ázirlenimi – «Zańdylyq» aqparattyq-taldamalyq júıesin tanystyrdy. Ol óz sózinde bul joba biryńǵaı sot praktıkasyn qalyptastyrýǵa jáne qylmystyq prosestiń ashyqtyǵyn arttyrýǵa, sýdıalar men prokýrorlarǵa – qylmystyq zańnama normalaryn qoldanýdyń dáldigin tekserýge múmkindik beretinin atap ótti.
«Biz 50 jyl boıy ǵaryshqa ushyp júrmiz. Úıler uıaly telefon arqyly basqarylady. Tehnologııalar barlyq jerde – úıde, kóshede, kólikte, jumysta. Munyń barlyǵy adamdarǵa yńǵaıly bolý úshin jasalǵan. Al qylmystyq isterdi áli kúnge deıin qaǵazda júrgizemiz, áli kúnge deıin qara qalammen aq qaǵazǵa jazyp júrmiz dep aıtýǵa bolady. Kıberdáýirde azamattardyń quqyqtaryn bizdiń konservatıvti jumysymyzǵa tehnologııalardy keńinen engize otyryp qorǵaýdyń ýaqyty jetti. «Zańdylyq» AAJ munyń qolymyzdan keletinin kórsetti. Shyn máninde, bir jaǵynan, artyq qaǵazbastylyqtan arylamyz. Ekinshi jaǵynan, adam faktoryn joıamyz, bul – óte mańyzdy dep atap ótti Bas prokýror.
«Zańdylyq» jobasynyń maqsaty – sotqa deıingi tergep-tekserýdiń biryńǵaı tizilimi men sot organdarynyń «Tórelik» aqparattyq-taldamalyq júıesin ıntegrasııalaý esebinen qylmystyq prosestiń sapasyn arttyrý.
Joba birqatar uıymdastyrýshylyq rásimder aıaqtalǵan soń 2017 jyldyń shildesinde qoldanysqa engiziledi.