Aqtaýda angarlyq tıptegi sport kesheni ashyldy

Aqtaýda angarlyq tıptegi sport kesheni ashyldy. Onyń qurylysy 2016 jyly tamyz aıynda bastalǵan edi. Joba quny 108 mıllıon teńge bolǵan. Qarjy jergilikti bıýdjetten bólingen, dep habarlaıdy lada.kz. Mańǵystaý oblysy múgedekter sport klýbynyń dırektory Nuraly Qulyshovtyń aıtýynsha, zaldyń ashylýyn múmkindigi shekteýli sportshylar 15 jyl kútken. Ázirge keshende 60 sportshy jatyǵyp jatyr.  Munda voleıbolmen, ústel tennısimen, shahmat jáne doıbymen aınalysýǵa qolaıly jaǵdaı jasalǵan. Kıim aýystyratyn oryndar men dýsh kabınalary qarastyrylǵan, sport zaldyń edenine jylý tartylǵan. «О́ńirdegi iri kompanııalardyń biri bizge bes mıllıon teńgedeı járdem kórsetti. Oǵan júgirýge arnalǵan qurylǵylar, velojattyǵý, doptar jáne ózge de sporttyq jabdyqtar alyndy. Jaqyn arada úlken tennıs, arbadaǵy sporttyq bı úıirmeleri ashylady. Mundaı jattyǵýlar úshin arnaıy arbalar alý kerek. Bizge qarjylaı qoldaý kórsete alatyn jandardan kómek suraımyz», - dedi N.Qulyshov. Búginde múgedekterge arnalǵan sport klýbyna sportpen belsendi aınalysatyn 167 adam tirkelgen. Jyl sońyna deıin olardyń sany 300-ge deıin jeti múmkin. Nuraly Qulyshovtyń aıtýynsha, bıyl kóktemde aýdandar men qalalarda jeńil atletıka, voleıbol, tennıs sekildi sporttyń jeti túri boıynsha jarystar ótkizý josparlanǵan. Jeńimpazdar ekinshi razrıad alady jáne respýblıkalyq spartakıadaǵa qatysady.