Qazaqstanda Ortalyq Azııa óńirlik glıasıologııalyq ortalyǵy qurylady

QR Parlamentiniń Májilisi plenarlyq otyrys barysynda «Qazaqstan Respýblıkasynyń Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (IýNESKO) arasyndaǵy Qazaqstan Respýblıkasynda Ortalyq Azııa óńirlik glıasıologııalyq ortalyǵyn qurý (2-sanat) týraly kelisimdi ratıfıkasııalaý týraly» zań jobasy birinshi oqylymda maquldady. «Kelisimge 2012 jyly Astana qalasynda IýNESKO bas dırektorynyń QR-ǵa resmı sapary barysynda qol qoıyldy. 17 memlekettiń ishinen Qazaqstandy tańdaý IýNESKO-nyń Qazaqstannyń glıasıologııa salasyndaǵy jetistikterin moıyndaýy bolyp tabylady», - dep habarlady zań jobasyn tanystyrǵan QR bilim jáne ǵylym mınıstri Erlan Saǵadıev. Mınıstrdiń aıtýynsha, bul ortalyq Ortalyq Azııa elderi ǵalymdarynyń zertteý boıynsha kúshterin biriktirýge jáne úılestirýge arnalǵan. «Qazirgi ýaqytta QR BǴM glıasıologııalyq ortalyq qurý úshin qajetti barlyq is-sharalar keshenin oryndady. QR Úkimetiniń kelisimine sáıkes, ortalyqty qarjylandyrý úshin qajetti qarajat bólingen. Qazaqstan úshin osy ortalyqtyń qurylýy óte mańyzdy. 2016 jyly 95 mln teńge bólingen», - dedi E. Saǵadıev. Sonymen qatar mınıstr mundaı ortalyqtyń álemde alǵash ret qurylyp jatqanyn aıtty. «Mundaı ortalyq álemde alǵash ret qurylýda. Quramy ár 5 jyl saıyn ózgerip otyratyn basqarýshylar keńesin qurý josparlanyp otyr. Ortalyqtyń basqarýshylar keńesiniń quramyna IýNESKO eki ókilin jáne QR-dan 5 ókildi qosý josparlanýda», - dedi mınıstr. Onyń aıtýy boıynsha, Qazaqstannyń ǵalymdary 60 jyl boıy osy salada zertteýler júrgizýde. «Ortalyqtyń qurylýy sý qaýipsizdigi, sondaı-aq klımattyń ózgerýi problemalary boıynsha júrgizilip jatqan zertteýlerdiń deńgeıin kóterýge múmkindik beredi. Geografııa ınstıtýtynan ortalyqta jumys isteý úshin aldyn ala 43 maman iriktelgen, olardyń 52,4%-y jas mamandar. Ortalyqtyń qurylý kezeńinde qyzmettik úı-jaı, jabdyq, baǵdarlamalyq qamtamasyz etý jáne tehnıkalyq quraldardy geografııa ınstıtýty bóledi», - dep málimdedi mınıstr. Atap óteıik, Ortalyq Azııa óńirlik glıasıologııa ortalyǵy (2-sanat) ǵylymı-zertteý qyzmetin úılestirýdi nyǵaıtý jónindegi fýnksııalar men mindetterdi oryndaıdy, ǵylymı zertteýlerdi júzege asyrady, óńirlik ǵylymı-zertteý baǵdarlamalarynyń ázirlemelerin kótermeleıdi.