Ýnıversıada – úkili úmitter báıgesi

Qazaq elinde tuńǵysh ret ótkizilgeli otyrǵan Dúnıejúzilik qysqy Ýnıversıada, Qudaı qalasa, egemen elimizdi dúnıe júzine taǵy bir tanytyp, abyroı bıigine shyǵarǵaly otyr. Ýnıversıadany Almatyda ótkizý týraly resmı sheshim 2011 jylǵy 29 qarashada Brıýsselde Halyqaralyq ýnıversıtettik sport federasııasynda (FISU) ótken daýys berý nátıjesinde qabyldanǵany belgili. Sol jyly elimizde 7-shi qysqy Azııa oıyndary joǵary deńgeıde ótkizilgenin eskersek, Almaty qysqy Ýnıversıada ótkizý quqyǵyn qalpaqpen uryp aldy deýge bolady. Shynynda da, ońtústik astana­myzdaǵy «Suńqar» shańǵymen sekirý halyqaralyq kesheni, Balýan Sholaq atyndaǵy Sport saraıy jáne Almaty oblysyndaǵy Shańǵy-bıatlon stadıony eń joǵary deńgeıdegi qysqy sport jarystaryn ótkizýge taptyrmaıtyn nysandar. Odan bólek, áıgili «Medeý» muz aıdyny men «Shymbulaq» taý-shańǵyly kýrorty bar. Ýnıversıada úshin qosymsha taǵy «Almaty Arena», «Halyq Arena» saraılary men Atletter qalashyǵy salyndy. Sporttyń on eki túrinen ótkiziletin dúnıejúzilik dodaǵa álemniń 60-qa jýyq elinen 2 myńnan astam stýdent-sportshy keledi. Sportshylarmen birge keletin bapker, kómekshilerdi aıtpaǵanda, jankúıer, týrıst retinde aǵylatyn qonaqtardyń ózi Almatyny qan bazarǵa aınaldyrary haq. «Qonaq az otyryp, kóp synaıdy» degen, ulty da, salty da basqa elderdiń kóńilin tabý qonaqjaı tabıǵatymyzǵa syn. Ýnıversıadany uıymdastyrý jáne ótkizý jónindegi dıreksııanyń jetekshisi Naıl Nýrovtyń aıtýynsha, Almaty sportshylar men qonaqtardy qarsy alýǵa 100 paıyz daıyn. Qonaqtardy kútýden bólek, olardyń meılinshe qaýipsiz bolýy da ábden oılastyrylǵan. Ýnıversıada uıymdastyrý komıteti teplovızor jabdyǵyn satyp alyp, áýejaıǵa ornalastyrdy. Atalǵan jabdyq Oıyndarǵa kelgen sportshynyń deniniń saý-syrqat ekendigin áýejaıda-aq anyqtap beredi. Qazaqstannyń stýdenttik qurama­synyń segiz qysqy Ýnıversıadaǵa qatysqan tájirıbesi bar. Osy ýaqyt aralyǵynda Qazaqstan quramasy qorjynyna 43 nagrada salǵan. Marapat máselesin aıtqanda, Ýnıversıada jeńimpazdary men júldegerlerine tabystalatyn medal jıyntyqtary da ázir. «Medaldar Ýnıversıada brendi men Halyqaralyq stýdenttik federasııanyń talaptaryna sáıkes jasaldy. Ýnıversıada urany úsh tilde jazylǵan», – deıdi Ýnıversıadany uıymdastyrý já­ne ótkizý jónindegi dıreksııasy jetek­shisiniń orynbasary Kamıla Luq­panova. Mádenıet jáne sport mınıstri Arystanbek Muhamedıuly Ýnı­ver­sıada júldegerlerine beriletin aq­shalaı syılyqtardyń kólemin de jarııa etti. Iаǵnı, altyn júldege qol jetkizgen sportshymyz memleketten 4,9 mln teńge, kúmis jáne qola medal alǵan júldegerler, sáıkesinshe, 3,3 mln teńge jáne 1,6 mln teńge syılyq alady. XXVIII Dúnıejúzilik qysqy Ýnıversıadada eki myńnan astam sportshy 12 sport túrinen 85 medal jıyntyǵyn sarapqa salady. Jarystar bizdiń elde ótetin bolǵandyqtan, árbir sportshy úshin abyroıly bolý – mártebe. Bizdiń sportshylar da álemdik jarysqa saqadaı saı. Árıne, sportshylarymyz 2011 jylǵy Azııa oıyndaryndaǵydaı báıgeniń aldyn bermese , bárimiz úshin zor jetistik. Biz de olarǵa úmitpen qarap, zor senim artamyz. Almatyda ótetin Dúnıejúzilik qysqy Ýnıversıadanyń tumary re­tinde suńqardyń tańdap alynýy da be­ker­den beker emes. Qyran qus jyl­damdyqty, jeńildikti, kúsh-qýat pen jeńiske degen qulshynysty beı­ne­lep qana qoımaı, qashannan qazaqy tabıǵatqa tán órlik pen erliktiń de belgisi bolǵan. Soǵan sáıkes «Qa­natyńdy keń serpi!» tirkesi Ýnı­ver­sıada urany retinde laıyqty tań­da­lypty. Aıtýly dodada Qazaqstan sport­shylarynyń – elimizdiń úkili úmitteriniń jeńis tuǵyrynan kóptep kórinip, azat eldiń abyroıyn asqaqtata túsýin tileımiz! Alǵa, Qazaq eliniń jas­tary! Bolatbek QAÝYSOV, S.Berdiqulov atyndaǵy syılyqtyń laýreaty