«Dańq» ordenimen tórt ret marapattalǵan

Soltústik Qazaqstan obly­syna arnalǵan en­sıklo­pedııa­lardyń bá­rinde Jambyl aýda­nyndaǵy, Jaltyrsha aýylynyń týmasy Ámiresh Dár­menovtiń «Dańq» or­deniniń tolyq ıegeri ekeni taıǵa tańba basqandaı anyq jazylǵan. Batyrdyń ómir jolyna úńiletin bolsaq, fashısterge qarsy qııan-keski shaı­qastarda 139-atqyshtar dıvızııa­synyń 609-atqyshtar polkiniń barlaýshysy, keıin bó­lim­she komandıri bolǵan ol 1944 jyly 22 sáýirde al­ǵash ret III dá­re­je­li «Dańq» ordenimen (№509751) marapattalǵan. Sol jyldyń 28 maýsymyn­da M­o­gılev qalasyn jaýdan azat etý kezinde fashısterdiń kózin joıy­p, tutqynǵa alǵany úshin II dárejeli «Dańq» ordenin keý­dege taqqan. Al 10 tamyzda qa­harmandyq erligi úshin ekin­shi márte II dárejeli «Dańq» ordenine (№134493) ıe bolǵan. 1945 jyly 24-25 naýryz kúnderi Dansıg (Gdansk, Polsha) qala­synyń túbinde jaý shebine enteleı enip, tankke qarsy qoldanylatyn granatamen úsh pýlemet uıasyn talqandapty. Jaýdy ók­sheleı qýa otyryp, qaramaǵyndaǵy jaýyngerlermen on bes jaý soldatyn tutqynǵa alǵan. Osy erligi úshin I dárejeli «Dańq» ordenimen (№1285) marapattalǵan. Árıne, aınalasy bir jyl­dyń ishinde Ámiresh Dár­menovtiń «Dańq» ordenimen tórt ret marapattalýy qazaq oǵlanynyń erligin kórsetse kerek. Basqalaı aıtqanda, «Dańq» ordeniniń tolyq kavaleri bolýmen qatar, ordenniń II dárejesimen eki ret marapattalǵan. Sóz arasynda «Dańq» ordeni KSRO joǵarǵy keńesi tóralqasynyń 1943 jylǵy 8 qarashadaǵy jar­lyǵy­men be­ki­tilip, úsh dáre­jesimen ma­ra­pattal­ǵandar Keńes Odaǵynyń Batyry ataǵyna te­ńestiril­ge­nin aıta ketken jón. Iаǵnı, Ámiresh Dár­menovti batyrlar sanatyna qosýǵa ábden bolady. Ekin­shi dúnıe­júzilik soǵysta «Dańq» ordenin bir maıdanger bes ret, 86 jaýynger tórt márte alypty. Beıbit ómirdegi ǵumy­ryn keń­shardyń malyn baǵýmen ótkizgen batyr atamyzdyń dúnıe­den ótkenin bıliktegiler bilmeı de qalǵan bolatyn. Araǵa bir aıdaı ýaqyt salyp, sıyrdyń tilindeı ǵana kóńil aıtýmen shektelgen. Búginge deıin eske­rýsiz qalyp kele jat­qan jerlesimizdi kesh te bolsa ulyqtap, bir kóshege atyn bere­tin kez jetkeni anyq. Basqa da qurmet kórsetilip jatsa, artyqtyq etpes edi. О́mir ESQALI, «Egemen Qazaqstan» Soltústik Qazaqstan oblysy