Altyn kórip, joldan taıdy

Stepnogor qalasyndaǵy Aqsý jumysshy kentinde polısııa qyzmetkerleri quramynda altyny bar kendi óńdeıtin jasyryn sehty anyqtady. Oblystyq IID baspasóz qyz­meti habarlaǵanyndaı, bul seh jergilikti turǵynnyń sharýa­shylyq aýlasynan tabylǵan. Kishigirim qorada kendi untaq­taıtyn, ony jýyp-shaıatyn jab­dyqtar men elektr qozǵaltqysh ornatylypty. Tártip saqshylary sehtyń 33 jastaǵy ıesin «ju­mys» barysynda quryqtaǵan. Qazirgi kúni atalǵan oqıǵaǵa baılanysty QR QK 334-babynyń 1-bólimimen (ken baılyǵyn óz betinshe paıdalaný) qylmystyq is qozǵaldy. Endigi jerde qyl­mysker 500 aılyq esep (135 mıllıon teńge) kóleminde aıyppul tóleýi nemese 90 táýlikke qamaýǵa alynýy múmkin. Endeshe, 33 jas­taǵy zińgitteı jigitti áıgili ma­qal tirkesindegi «perishte» deýi­mizge de kelmeıtindeı. Jalpy, ońaı oljaǵa kenelgisi keletinder qatary azaıatyn emes. Olaı deýimizge, byltyr polıseıler 6500 zańsyz «kenshini» us­tap, quramynda altyny bar ken­di óńdeıtin 29 shaǵyn sehtyń jumysyn toqtatqany jáne saýda aınalymyna shyǵarylǵan 20 tonna altyn kenin tárkilegeni negiz bolady. Sondaı-aq, shah­ta­lardyń tereń qoınaýyna túsýge múmkindik beretin 16 jasyryn oıyq tabylǵan. Árıne, bul oqıǵalar boıynsha 100-den astam qylmystyq is qozǵalǵan. Jazalaryn ótep jatqan jastar qanshama deseńiz-­shi. Anyqtalmaǵandary da bar  de­sek, eshkim talasa qoımas. Son­da, bizde shynaıy perishteler joq bolǵany ma? Baqbergen AMALBEK, jýrnalıst Aqmola oblysy