Atyraý aýmaǵynan jańa qoqys polıgony salynady

Atyraý qalasy aýmaǵynan jańa qoqys polıgonyn salýǵa jer bólindi, - dep habarlaıdy QazAqparat. Atyraýda qazir qalanyń tazalyǵyn saqtaý maqsatynda úsh júzden astam jol jumysshylary men 200 tehnıka jumys jasap keledi. Turǵyndardyń kúndelikti qatty turmystyq qaldyqtaryn qoqys polıgonyna jetkizý, kósheni qardan, jańbyr sýynan tazalaý jumystary «Arnaýly avtobaza» JShS mekemesine júktelgen. «Arnaýly avtobaza» JShS dırektory Samat Turnııazovtyń aıtýynsha, qalanyń tazalyǵy ótken jyldyń qyrkúıek aıynan bastap oblys ákimdiginiń basty nazarynda. Oblys ákimdiginiń qoldaýymen 2016 jyldyń kúzinde jumysshylardyń aılyq eńbekaqylaryna 35 myń teńgeden qosylyp, qyzmetkerlerdiń sany 180-nen 320 adamǵa kóbeıtilgen. - Qazirgi tańda Atyraý qalasy men qala aýmaǵyndaǵy eldi mekenniń kóshelerinde 2600-dan astam qoqys jáshigi bar. Olardy kúnine 22 arnaýly kólik jınap, qoqys polıgonyna jetkizip otyrady. Qaladan 5 shaqyrym jerde ornalasqan qoqys polıgonynyń aýmaǵy 35 gektar jerdi quraıdy. Qyryq jyldan beri qalanyń kúl-qoqysy sol jerge shyǵarylyp keledi, - deıdi Samat Turnııazov. Qazirgi tańda jańa qoqys polıgonyn salý úshin Mahambet aýdany aýmaǵynan da 50 gektar jer telimi bólinip otyr. Basshynyń aıtýynsha, qalaǵa áli 1000 qoqys jáshigi qajet. Sondaı-aq, qalany qardan tazalaýǵa kúrekpen jabdyqtalǵan 10 avtokólik jáne tuzdy topyraq shashatyn, joldardy qardan tazalaıtyn arnaıy tehnıkalar bar.