Ýnıversıadada aýyr jaraqat alǵan sportshylar aýrýhanaǵa tikushaqpen jetkiziledi

Ýnıversıada kezinde aýyr jaraqat alǵan sportshylar aýrýhanaǵa tikushaqpen jetkiziledi. Áýe kólikteri asa qaýipti sport túrlerinen saıys ótetin úsh nysanǵa kezekshilik etedi. Atap aıtqanda - Medeý, Tabaǵan taýly aımaqtary men Almaty arenada zardap shekkender, nebári 15 mınýtta aýrýhanaǵa jetkizilip, shuǵyl kómek ala alady. Bul týraly "Almaty" telearnasy habarlady. Dúbirli doda kezinde aýyr jaraqat alǵan naýqastarǵa shuǵyl kómek № 7 jáne 4-shi qalalyq aýrýhanalarda kórsetiledi. Ol úshin qos aýrýhananyń bazasynda arnaıy tikushaq qonatyn alań jasaldy. Jospar boıynsha jedel-járdem kóligi tikushaqpen jetkizilgen naýqasty kútip alyp, birden aýrýhananyń qabyldaý bólimshesine jetkizedi. Ol nebári 2 mınýt ýaqytty alady. Ýnıversıadany ótkizýge dárigerler saqadaı saı. Qajetti medısınalyq qural-jabdyqpen jáne dári-dármekpen qamtamasyz etilgen kezekshi jedel medısınalyq kómek brıgadasy barlyq 9 sport nysanynda da jumys isteıtin bolady. Jańadan alynǵan 40 jedel járdem kóligi shuǵyl, dereý jáne qajetti medısınalyq kómek kórsetýge daıyn turady. Sporttyq saıystar ótetin aýmaqtarda 150-den astam jedel kómek kórsetetin aq halattylar bolady. "Ýnıversıadany ótkizý aıasynda mınıstrlik Almaty qalasynyń ákimshiligimen birge qatysýshylarǵa shara barysynda jáne toqtaǵan ornynda ýaqtyly, sapaly medısınalyq kómek kórsetý máselelerin pysyqtady. Jalpy medısınalyq kómek kórsetý stasıonarlyq túrde kórsetiletin bolady, jedel-járdem túrinde kórsetiletin bolady. Sondaı-aq medısınalyq pýnktterdiń qyzmetteri uıymdastyrylatyn bolady. Búgingi tańda qajetti daıarlyq tolyq aıaqtaldy desek bolady", - dedi QR Áleýmettik damý jáne densaýlyq saqtaý mınıstri Tamara Dúısenova. Jarys kezinde kómek kórsetetin jedel-járdem qyzmetkerleriniń barlyǵy kózge erekshe túsetin, arnaıy kıim úlgisimen qamtamasyz etilgen. Olardyń barlyǵy da aǵylshyn tilinen dáris ótip, jattyǵypty.