"Samuryq-Qazynaǵa" tıesili kompanııalar aldaǵy 3-5 jylda jekeshelendiriledi

«Astana» halyqaralyq qarjylyq ortalyǵynyń (AHQO) basqarýshysy Qaırat Kelimbetov bastap barǵan delegasııa Gonkongte ótken onynshy Azııa qarjy forýmyna qatysty, dep habarlaıdy QazAqparat. «Qazaqstan «Bir beldeý - bir jol» tranzıttik-kóliktik júıeni damytý aıasynda tájirıbe júzinde sharalardy birinshi bolyp bastady. Bir jaǵynan alyp qaraǵanda, biz Ortalyq Azııanyń bóligi bolyp tabylamyz, al ekinshi jaǵynan - Eýrazııalyq ekonomıkalyq odaqtyń quramyndamyz. (...)  Elimiz «Bir beldeý-bir jol» baǵdarlamasynda negizgi seriktes retinde tańdaldy. Atap aıtqanda, Prezıdent Nursultan Nazarbaev Qazaqstanda jańa tuǵyrnamany qurý týraly maqsatty júktedi jáne ony biz «Astana» halyqaralyq qarjylyq ortalyǵy dep atadyq. Ol Dýbaı halyqaralyq qarjy ortalyǵyna nemese Ábý-Dabı jahandyq naryǵyna óte uqsas», - dedi Kelimbetov moderatordyń suraǵyna jaýap berý kezinde. Budan bólek, forým alańynda AHQO basqarýshysy Bloomberg agenttigine suhbat berdi. «Meniń oıymsha, Qazaqstannyń Úkimeti men Ulttyq banki durys strategııany tańdady. 2015 jyldyń tamyzynda elimiz aqshalaı-nesıelik memlekettik saıasattyń jańa rejimine kóshti. Bul óz kezeginde bizge kez kelgen syrtqy qaterli yqpaldardy eńserýge múmkindik beredi. Munaı baǵasynyń quldyraýy men Reseıdegi ekonomıkalyq resessııaǵa baılanysty Qazaqstanǵa eki ese salmaq tústi. Biz jaýapkershilikti fıskaldi saıasatty júrgize bastadyq», - dedi ol. Onyń sózine qaraǵanda, Qazaqstanda jumys istemeıtin zaımdardyń sanatyna 10 paıyzdan tómen kórsetkish tıesili. Bul sońǵy bes jylda úlken jetistik bolyp tabylady. Qazaqstan jańa ındýstrıaldyq aktıvterdi, sondaı-aq ınfraqurylym men qyzmet kórsetý salasynda jańa ekonomıkany qurýǵa erekshe mán berip otyr. «Biz korporatıvtik basqarýdy jaqsartýǵa kóńil bólip otyrmyz. Ondaǵy ádisterdiń biri - jappaı jekeshelendirý. «Samuryq-Qazyna» qory quramyndaǵy tıisti memlekettik kompanııalardy 3-5 jylda jekeshelendirý eskerilgen. Memlekettik kompanııalardyń ashyq ári tıimdi qurylymy Qazaqstan úshin paıdaly bolatynyn túsinip otyrmyz»,-dedi ol. Esterińizge sala keteıik, budan buryn QazAqparat agenttigine bergen suhbatynda Kelimbetov AHQO-ny qurýdyń maqsaty tikeleı sheteldik ınvestısııalardy Qazaqstannyń jáne jalpy Ortalyq Azııanyń damýy úshin tartýǵa negizdelgenin atap ótken edi. Ekinshi másele -  bul AHQO jańa bırjasynyń múmkinshiligi. Kóptegen uıymdar aksıoner bolǵylary jáne bolashaqta bırjada jumys istegileri keledi. Qazirgi ýaqytta Shanhaı men Gonkong qor bırjalarymen, Gonkong tústi metaldar bırjasy jáne Shanhaı altyn bırjasymen kelissózder júrgizilýde.