«Jańa serpin» ortalyǵy suranysqa ıe mamandyqtar tizimin jarııalady

Mańǵystaý oblysynda 2016 jyly «Jańa serpin» ortalyǵyna bos jumys oryndary boıynsha 365 suranys túsip, 306 adam turaqty jumyspen qamtylǵan. Onyń ishinde shalǵaı aýylda turatyndar sany - 235. Bul týraly «Jańa serpin» kommýnaldyq memlekettik mekemesiniń baspasóz-hatshysy Maıra Dosnııazova habarlady. Eki qolǵa bir kúrek tapqandar «Aqtaý teńiz porty» arnaıy ekonomıkalyq aımaǵy», júk tasymaldaýshy termınaly, Asfalt-bıtým, qurylys materıaldary, plastıkalyq qubyrlar óndirý, tigin-dızaıner, pedagogıka, densaýlyq saqtaý, abattandyrý, qurylys, qoǵamdyq tamaqtandyrý kásiporyndaryna jumysqa qabyldanǵan. Máselen, «Aqtaý teńiz porty» arnaıy ekonomıkalyq aımaǵy jáne «Jańa serpin» ortalyǵy ótken jyly yntymaqtastyq ornatý maqsatynda 17 Memorandýmǵa qol qoıdy. Al óńirdegi mekemelerden 300-ge jýyq bos jumys oryndary usynylǵan. Onyń 100-den astam mamandyq ıeleri suranym boıynsha Almatydaǵy «Qazaqstan jol ǵylymı-zertteý ınstıtýty» AQ, Reseıdiń Sankt-Peterbýrg qalasyndaǵy «Teńiz kadr agenttigi» qoǵamdyq shekteýli seriktestigi jáne «Eksport Injınırıng» kásiporny, Máskeýdegi «Bilim salasy qyzmetkerleriniń biliktiligin arttyrý jáne qaıta daıarlaý» akademııasynda qaıta daıarlaý kýrstarynan ótken. «Jańa Serpin» ortalyǵynyń dırektory Qaırat Ryspaevtyń aıtýynsha, ortalyq óz kezeginde halyqqa arnalǵan qyzmettiń 17 túrin kórsetedi. «Jańa serpin» baǵdarlamasy týraly Aqtaý men Jańaózen qalalary, sonymen qatar Munaıly aýdanynda 125 kásiporynǵa prezentasııa ótkizilip, 671 adam keńes aldy. Orta mekteptiń joǵary synyp oqýshylaryna kásibı baǵdar berý úshin oblystyń barlyq aýdandarynda bolyp, 500-ge jýyq túsinik jumystary júrgizildi», – deıdi ol. О́ńirde eńbek naryǵyn zerttegen «Jańa serpin» ortalyǵynyń mamandary, asa tapshy jáne joǵary suranysqa ıe mamandyqtar tizimine taldaý jasaǵan. Nátıjesinde, Mańǵystaý óńirinde metall jonýshy, baqylaý-ólsheý aspaptary jáne avtomatıka, saýda menedjeri, geodezııashy, broker, logıstıka salasy, agronom, mal dárigeri, tis dárigeri, IT-mamany, elekrshi, aspazshy, dánikerleýshi, qubyr jóndeýshi salasynyń mamandary tapshy. Al «Jańa serpin» ortalyǵyna jumys izdep kelgen 193 adamnyń túıindemeleri túrli kompanııalarǵa joldanyp, 255 túıindeme qaıta óńdelýde. Gúlaıym ShYNTEMIRQYZY, «Egemen Qazaqstan»