«Jańa serpin» ortalyǵy» kommýnaldyq memlekettik mekemesi qurylys salasyna qajet mamandardy daıyndaıdy. 2020 jylǵa deıin oblys ákimdiginiń qoldaýymen turǵyndardy eńbekpen qamtý boıynsha yqpal etý baǵdarlamasy qabyldanǵan bolatyn. Bul týraly Mańǵystaý óńirindegi qurylys kompanııalarynyń ókilderi habardar boldy, dep málimdedi «Jańa serpin» ortalyǵy MKM baspasóz hatshysy Maıra Dosnııaz.
Qurylys kompanııa ókilderiniń aldynda sóz sóılep, prezentasııa jasaǵan «Jańa serpin» ortalyǵy dırektorynyń orynbasary Nurbek Sultan jumys berýshilerdi memleket esebinen jumys kúshin tartýǵa berilip otyrǵan múmkindikti tıimdi paıdalanýǵa shaqyrdy.
Jumys berýshi ózine qajetti maman izdep ortalyqqa ótinim beredi, al ortalyq mamandary jumyssyzdar arasynan kerekti úmitkerdi izdestiredi. Oqý-úıretý uıymdarynyń tizimi aýmaqtyq jaǵynan shektelmeıdi, kásibı biliktiligin arttyrý úshin tek el ishinde ǵana emes, sonymen qatar shet memleketterge de barýǵa bolady. Ol úshin jumys berýshi «Jańa serpin» ortalyǵyna ótinim berse jetip jatyr. Oqý kýrstaryn bitirgen soń qorytyndy áńgimelesý ótkiziledi jáne odan jaqsy ótse jeke eńbek kelisimsharty jasalady.
«Aıta ketý kerek, Mańǵystaý óńirinde sońǵy jyldary qurylys salasy qarqyndy damyp keledi. Jańadan salynyp jatqan ǵımarattar sany az emes, ásirese turǵyn úıler, keńseler, ákimshilik ǵımarattar, aýrýhanalar, mektepter, balabaqshalar jáne basqa da áleýmettik nysandar birinen soń biri boı kóterýde. Bul oraıda qurylys kompanııalary kadr tapshylyǵyn sezinýi múmkin. Sol sebepti búgin osy sharany uıymdastyrdyq. Iаǵnı, bizdiń ortalyq arqyly daıyn maman shyǵarýǵa bolatynyn túsindirýge tyrystyq. Bul jaqsy múmkindik ekendigin qurylys kompanııa ókilderi de túsinip otyr», – deıdi «Jańa serpin» ortalyǵy dırektorynyń orynbasary Nurbek Sultan.
Kezdesý barysynda belgili bolǵandaı, qurylys kompanııalary aıtarlyqtaı maman tapshylyǵyn sezinbeıdi eken. Alaıda, memlekettik qoldaýdan bas tartqysy joq, kerisinshe aldaǵy ýaqytta ortalyqtyń kómegine júginýi múmkin ekendigin jasyrmady.
Atalmysh baǵdarlamda qaıta daıarlaý kýrsynan ótetin jas mamandarǵa áleýmettik qoldaý qarastyrylǵan. Iаǵnı, aı saıynǵy shákirtaqy, tamaqpen qamtý, jataqhana jáne qajet bolǵan jaǵdaıda jol aqysy da tólenedi. Sondaı-aq, shalǵaı aýyldan kelgen jumyssyz adamdar turaqty eńbekpen qamtylǵan jaǵdaıda, memleket esebinen jataqhanadan olarǵa oryn beriledi.
Gúlaıym ShYNTEMIRQYZY, «Egemen Qazaqstan»
