Foto: primeminister.kz
Keńeste usynylǵan aldyn ala derekterge sáıkes, naýryz aıynda áleýmettik mańyzy bar azyq-túlik baǵasynyń ortasha ósý ındeksi 0,3% boldy. Al ótken jyldyń osy kezeńinde bul kórsetkish 0,9% edi. Iаǵnı baǵa ósimi aıtarlyqtaı baıaýlaǵan.
Jalpy alǵanda, birinshi toqsandaǵy baǵa ósimi 1,2% deńgeıinde qalyptasty. Bul 2025 jyldyń osy kezeńindegi 3,8% kórsetkishinen 3 ese tómen. Sarapshylar muny baǵa dınamıkasynyń turaqty túrde baıaýlap kele jatqanynyń belgisi dep baǵalap otyr.
Keńeste tutyný baǵalary ındeksi halyqaralyq ádisteme boıynsha esepteletini atap ótildi. Ol 537 túrli taýar men qyzmetti qamtıdy. Baǵa monıtorıngi el boıynsha 12 000-nan astam saýda nysanynda júrgiziledi. Al ishki saýda júıesinde 760 000-ǵa jýyq kásipkerlik sýbektisi jumys isteıdi, onyń ishinde 300 000-nan astamy azyq-túlik ónimderin satýmen aınalysady.
Baǵanyń negizgi tómendeýi kókónis ónimderi esebinen tirkeldi. Atap aıtqanda:
- Qyryqqabat 1,9% arzandady;
- Qyzanaq 2,6% tómendedi;
- Pııaz 10,9% kemidi;
- Qııar 22,6% arzandady.
Jyl basynan beri qııar baǵasy jalpy 31,1% tómendegen.
Saýda jáne ıntegrasııa birinshi vıse-mınıstri Aıjan Bıjanova naryqty otandyq ónimmen qamtýdaǵy oń ózgeristerdi jylyjaı sharýashylyqtaryn qoldaý baǵdarlamasymen baılanystyrdy.
«Qazirgi ýaqytta mınıstrlik ónerkásiptik jylyjaılarmen qyzanaq pen qııar baǵasyn turaqtandyrý jóninde memorandýmdar jasasý boıynsha kelissózder júrgizip jatyr», dedi ol.
2025 jyldyń qorytyndysy boıynsha elimizdegi jylyjaılardyń jalpy aýmaǵy 1,33 myń gektardy qurap, bir jylda 12,6 gektarǵa artqan. Ásirese fermerlik jylyjaılardyń úlesi ósip, 713,3 gektardan 799,4 gektarǵa deıin ulǵaıǵan.
Sonymen qatar «QTJ» UK» AQ áleýmettik mańyzy bar azyq-túlik taýarlaryn jáne áleýmettik nanǵa arnalǵan undy tasymaldaýǵa temirjol tarıfterin tómendetý máselesin qarastyryp jatyr.
Kóktemgi maýsymda baǵanyń ósý yqtımaldyǵyn eskere otyryp, naryqtaǵy qorlar men ımport máselesi de talqylandy. Qazirgi tańda turaqtandyrý qorlaryndaǵy ónimder belsendi satylyp jatyr. Aýyl sharýashylyǵy mınıstrliginiń málimetine sáıkes, qordaǵy qaldyq kólemi jalpy qordyń shamamen 24% quraıdy.
Naýryz aıynyń basynan beri ishki naryqqa Qytaıdan erte pisetin kókónister jetkizý jolǵa qoıylǵan. Búginge deıin 3200 tonna kartop, 800 tonna sábiz jáne 14 tonna qyryqqabat ákelindi.
31 naýryzda Saýda komıteti, óńirlik áleýmettik-kásipkerlik korporasııalar, iri saýda jelileri, KTZ-Express jáne QazTrade ókilderinen quralǵan delegasııa О́zbekstannyń ońtústik óńirlerine erte ónim satyp alý úshin barady.
Baǵanyń tómendeýine Naýryz meıramy qarsańynda uıymdastyrylǵan jármeńkeler de oń áser etti. El boıynsha mereke kúnderi 200-den astam jármeńke ótti. Jyl basynan beri olardyń sany 1,5 myńǵa jetti.
Al «Nauryz sale» aksııasyna 70% deıin jeńildik usynǵan 300 saýda sýbektisi qatysyp, 4 mıllıonnan astam adam qamtyldy.
