Qurmet qaraýyl rotasynyń súıemeldeýimen eki eldiń tarıhı murasyna qurmet belgisi retinde Bas shtab bastyǵy − Qurlyq áskerleri bas qolbasshysynyń birinshi orynbasary general-maıor Qýanyshbek Úshtaev pen Fransııanyń Qazaqstandaǵy elshisi Sılvıan Gıoge Fransııa halqynyń táýelsizdigi men ulttyq birliginiń sımvolyna aınalǵan Sharl de Goll eskertkishine gúl shoqtaryn qoıdy.
– Soǵys jyldary mıllıondaǵan adam taǵdyry synǵa tústi. Otqa oranǵan maıdan dalasynda fransýzdarmen birge jaýǵa qarsy jan alyp, jan berisken shaıqasta jeńiske jetýge partızandardyń qosqan úlesi zor boldy. Búgingi marapattaý rásimi tek ótkenge taǵzym ǵana emes, batyrlarymyzdyń erligin ulyqtaý. Jaýyngerlerimizdiń esimi urpaq jadynda máńgi saqtalady, – dedi general-maıor Qýanyshbek Úshtaev.
Qandy qyrǵynda 300-den astam otandasymyz Fransııanyń Týlýza qalasy men onyń mańyn azat etýge belsene qatysqan.
Aıda Balaeva: Jeńis kúni – keler urpaqqa taǵylym beretin qasıetti kún
Búgin sol jaýyngerlerdiń beseýi, ıaǵnı Ahmet Bektaev, Bektemir Baıjanov, Nuranbaı Baımuratov, О́teýálı Beısenǵalıev, Ahmet Sýbalovtyń balalary men nemerelerin Fransııanyń Qazaqstandaǵy Tótenshe jáne О́kiletti elshisi Sılvıan Gıoge Fransýz Respýblıkasynyń Qarýly kúshter jáne ardagerler mınıstri Katrın Votrenniń atynan 1939-1945 jylǵy Ekinshi dúnıejúzilik soǵysta Fransııany azat etýge shaıqasqany úshin «Azat etý» medalimen marapattady.
– Úsh júzden astam Qazaqstan azamaty Fransııa jerinde fransýzdarmen birge, qatarlasa, elimizdi azat etý jolynda shaıqasty. Osylaısha, olar óz Otanyna myńdaǵan shaqyrym jerde, ortaq jaýǵa qarsy birigip, qıyndyqtardy bastan keshirip, qan tógip, tipti jandaryn pıda etti. Kezinde general de Goll olarǵa qurmet kórsetti, al búgingi Fransııa muny umytpaıdy, – delingen Fransııa Qarýly kúshteri jáne ardagerler mınıstri Katrın Votrenniń sózinde.
Partızan jaýyngerlerdiń balalary men nemereleri erekshe tolqyp, alǵystaryn bildirdi. Urpaqtary bul Jeńistiń 81 jyldyǵynda erekshe syı bolǵanyn aıtady.
Astanada «Otan Ana» monýmentine gúl shoqtary qoıyldy
– Búgingi tolqynysymyz erekshe. Ákemizdiń erligi ulyqtalyp jatyr. О́te rızamyz, kózimizge jas kelip tur. Batyrlar rýhyna qurmet kórsetip jatqan Fransııaǵa, elimizdiń Qorǵanys mınıstrligine alǵysymyz sheksiz, – dedi partızan jaýynger Bektemir Baıjanovtyń uly Syrlybaı Bektemirov.
Is-shara sońynda marapattaý rásimine qatysqan ardagerler men qonaqtar estelik sýretke tústi.
