«9 mamyr – halqymyzdyń jadynda máńgi saqtalǵan uly kún. Erlik pen eldiktiń, qaısar rýh pen otanshyldyqtyń merekesi. Osy kúni biz babalarymyzdyń ólsheýsiz erligin zor rızashylyqpen eske alyp, maıdan dalasynda qaza tapqan qaharmandardyń rýhyna taǵzym etemiz. Adamzatqa fashızmnen azat bolashaq syılaǵan ardagerlerimizge shynaıy alǵysymyzdy bildiremiz. Memleket basshysy atap ótkendeı, Qazaqstan ortaq Jeńiske, jer betinde ádilet pen erkindiktiń saltanat qurýyna orasan zor úles qosty. Álııa Moldaǵulova, Mánshúk Mámetova, Talǵat Begeldınov, Qasym Qaısenov, Raqymjan Qoshqarbaev, Sergeı Lýganskıı, Hıýaz Dospanova, Saǵadat Nurmaǵambetov jáne basqa da kóptegen batyrlardyń esimi Uly Jeńis shejiresine altyn árippen jazyldy.
Júzdegen qazaqstandyq Keńes Odaǵynyń Batyry atanyp, myńdaǵan jaýynger maıdan dalasynda kórsetken erligi men qaharmandyǵy úshin jaýyngerlik ordendermen jáne medaldarmen marapattaldy», dedi Aıda Balaeva.
Osy rette ol soǵys jyldarynda mádenıet pen ádebıet te erekshe mıssııa atqarǵanyn sóz etti.
«Uly jeńis kezinde qazaq qalamgerleri qalam men qarýdy qatar ustap, maıdan shebinde de, shyǵarmashylyqta da halyqtyń rýhyn kóterýge zor úles qosty. Málik Ǵabdýllın, Kemel Toqaev, Ázilhan Nurshaıyqov, Qasym Amanjolov, Qasym Qaısenov jáne basqa da maıdanger jazýshylar óz shyǵarmalarynda soǵys jyldaryndaǵy erlikti, otanshyldyqty jáne ómir shyndyǵyn kórkem beınelep, keler urpaqqa qundy ádebı mura qaldyrdy. Búginde elimizde maıdangerler erligin ulyqtaý baǵytynda aýqymdy jumys júrgizilip keledi.
Osy maqsatta Mádenıet jáne aqparat mınıstrligi ótken jyly maıdangerler týraly derekterdi jınaqtaýǵa, júıeleýge jáne saqtaýǵa, sondaı-aq olardyń Uly Jeńiske qosqan úlesi jónindegi aqparatqa ashyq qoljetimdilikti qamtamasyz etýge arnalǵan biregeı «Batyrlarǵa taǵzym» onlaın-portalyn iske qosty», dedi mınıstr.
Onyń aıtýynsha, saıtta 705 488 ardager týraly málimet ornalastyrylǵan. Olardyń qatarynda 365 Keńes Odaǵynyń Batyry, 4 eki márte Keńes Odaǵynyń Batyry jáne 19 «Dańq» ordeniniń ıegeri bar.
Sondaı-aq, qoǵamda batyrlar esimin ulyqtaý isine de aıryqsha mán berilip keledi. Jeńistiń 80 jyldyǵyna oraı ekinshi dúnıejúzilik soǵystyń 500-den astam ardageriniń esimin kósheler men dańǵyldarǵa berý týraly sheshim qabyldandy.
«Qadirli dostar! Jeńis kúni – ótkenge taǵzym etetin ǵana emes, keler urpaqqa taǵylym beretin qasıetti kún. Bizdiń ortaq paryzymyz – soǵys týraly tarıhı shyndyqty saqtaý, jastardyń boıyna otanshyldyq, birlik jáne ata-baba erligine qurmet qundylyqtaryn sińirý. Barshańyzdy Jeńis kúnimen taǵy da quttyqtaımyn! Elimizde árdaıym beıbitshilik pen kelisim saltanat qursyn!», delingen quttyqtaýda.
