Foto: esgnews.com
Maqala avtorlarynyń aıtýynsha, sońǵy jyldary Qazaqstan halyqaralyq turaqsyzdyq jaǵdaıynda tek turaqtylyǵyn saqtap qana qoımaı, Eýrazııadaǵy mańyzdy ekonomıkalyq, logıstıkalyq jáne tehnologııalyq ortalyq retindegi pozısııasyn kúsheıte aldy.
Bloomberg bul ózgeristerdiń sımvoly retinde Astanany ataıdy. Basylym qazirgi astana osydan shırek ǵasyr buryn dala tósindegi shaǵyn qala bolǵanyn, al búginde biregeı sáýleti men aýqymdy ınfraqurylymdyq jobalary bar zamanaýı megapolıske aınalǵanyn eske salady.
«Astana eń aldymen óziniń neni bildiretinimen qyzyqty», delingen Bloomberg jarııalanymynda.
Alaıda avtorlar negizgi nazardy eldiń syrtqy kelbetine emes, onyń jańa geoekonomıkalyq shyndyqtaǵy róline aýdarady.
Bloomberg baǵalaýynsha, Qazaqstan álemdegi eń iri naryqtardy baılanystyratyn mańyzdy býyn retinde barǵan saıyn senimdi áreket etýde. Maqalada Transkaspıı halyqaralyq kólik baǵytyna, ıaǵnı Orta dálizge erekshe oryn berilgen. Bul baǵyt Qytaı men Eýropa arasyndaǵy júk tasymalynyń negizgi arnalarynyń birine aınalyp keledi.
Basylym jahandyq logıstıkadaǵy ózgerister aıasynda Qazaqstan óziniń geografııalyq ornalasýyn strategııalyq artyqshylyqqa aınaldyryp, Eýrazııadaǵy tranzıttik hab retindegi rólin aıtarlyqtaı kúsheıtkenin atap ótedi.
«El Qytaı, Reseı jáne Eýropa arasyndaǵy ornalasýyn ekonomıkalyq artyqshylyq retinde paıdalanyp otyr», dep jazady Bloomberg.
Sonymen qatar, eldiń jahandyq syn-qaterlerdi óz damýyna tıimdi paıdalana bilý qabileti erekshe atap ótiledi. Avtorlardyń pikirinshe, Qazaqstan halyqaralyq naryqtardaǵy ózgeristerge, energetıkalyq daǵdarystarǵa jáne logıstıkalyq tizbekterdiń qaıta qurylýyna beıimdelip, saýda men ınvestısııa tartý úshin jańa múmkindikter asha aldy.
Bloomberg eldiń sıfrlyq transformasııasyna da úlken nazar aýdarady. Jarııalanymda Qazaqstan aımaqtaǵy sıfrlandyrý kóshbasshylarynyń biri retinde atalady. Avtorlar elektrondy úkimettiń joǵary deńgeıde damyǵanyn jáne memlekettik basqarýǵa sıfrlyq servısterdiń belsendi engizilip jatqanyn atap ótedi.
Basylymnyń erekshe qyzyǵýshylyǵyn Qazaqstannyń jasandy ıntellekt salasyndaǵy josparlary týdyrǵan. Maqalada JI-ni damytý memlekettik basymdyqtardyń birine aınalǵany jáne eldiń jańa tehnologııalyq dáýirge mamandar daıarlaýǵa basymdyq berip otyrǵany aıtylǵan.
«Qazaqstan jasandy ıntellekt pen sıfrlyq ınnovasııalar boıynsha óńirlik ortalyqqa aınalýǵa umtylýda», dep jazady materıal avtorlary.
Halyqaralyq ınvestorlardyń nazaryn aýdaratyn faktorlardyń qatarynda Bloomberg Astana Hub qyzmetin, data-ortalyqtardyń damýyn, strategııalyq mańyzdy mıneraldar salasyndaǵy jobalardy jáne «Astana» halyqaralyq qarjy ortalyǵynyń jumysyn ataıdy.
Basylym sondaı-aq eldiń demografııalyq áleýetine nazar aýdarady. Qazaqstan halqynyń shamamen jartysy 30 jasqa tolmaǵan. Avtorlardyń pikirinshe, bul ınnovasııalyq ekonomıka men tehnologııalyq kásipkerlikti odan ári damytýǵa negiz qalaıdy.
Jalpy alǵanda, Bloomberg Qazaqstandy shıkizattyq ekonomıka týraly dástúrli túsinikten shyǵyp, tehnologııalarǵa, logıstıkaǵa, adamı kapıtalǵa jáne halyqaralyq yntymaqtastyqqa basymdyq berip otyrǵan memleket retinde sıpattaıdy.
Jarııalanymnyń negizgi qorytyndysy – Qazaqstandy álemdik bıznes qaýymdastyǵy endi shetkeri naryq emes, derbes ekonomıkalyq ósý ortalyǵy ári Eýrazııanyń jańa arhıtektýrasyn qalyptastyratyn mańyzdy qatysýshylardyń biri retinde jıi qarastyra bastady.
