Foto: gov.kz
Mınıstrdiń aıtýynsha, sportshynyń jalaqysyn tólemeýge qatysty eshqandaı fakti anyqtalmaǵan. Al mundaı jaǵdaıdyń týyndaýyna burynǵy kelisimsharttyń aıaqtalýy sebep bolǵan.
«Mıhaıl Shaıdorov 2026 jyldyń aqpanyna deıin burynǵy kelisimshart boıynsha jalaqy alyp keldi. Olımpıadadan keıin bul kelisimshart aıaqtaldy. Naýryz aıynan bastap jańa sıklge arnalǵan kelisimshart jasalýy tıis edi. Qazirgi tańda jańa kelisimshartqa qol qoıylmaǵandyqtan, jańa tólemder berýge zańdy negiz joq», dedi Erbol Myrzabosynov.
Vedomstvo basshysy jańa kelisimshart barlyq ulttyq qurama sportshylaryna ortaq tıptik shart negizinde usynylatynyn atap ótti. Onyń aıtýynsha, sportshynyń olımpıadalyq jetistigi eskerilip, oǵan tıimdirek sharttar qarastyrylǵan.
«Qarjylandyrýdy qysqartý nemese jaǵdaıdy nasharlatý týraly áńgime joq. Kerisinshe, onyń mártebesi eskerilgen. Biraq sportshy kelisimsharttaǵy «mindettemeler» tarmaǵymen kelispegen», dedi mınıstr.
Sonymen qatar ol sportshyǵa qatysty qysym jasalyp jatqany týraly aqparatty joqqa shyǵardy.
«Bul jerde qandaı da bir qysym nemese jazalaý oryn alyp jatqan joq. Barlyq másele tek zańdyq sıpatta qaralyp jatyr», dedi Erbol Myrzabosynov.
Mınıstr Olımpıada altyny úshin beriletin syıaqy maýsym-shilde aılarynda tólenetinin, al sportshyǵa «Eńbek sińirgen sport sheberi» ataǵy boıynsha buıryq burynnan daıyn ekenin, tek resmı tabystaý rásimi qalǵanyn málimdedi. Sondaı-aq ol barlyq másele baqylaýda ekenin aıtyp, zań aıasynda sheshiletinin jetkizdi.
Eske sala keteıik, buǵan deıin Olımpıada chempıony jalaqysynyń 5 aı boıy keshigip jatqanyn aıtyp málimdeme jasaǵan bolatyn. Jaǵdaıǵa qatysty elimizden shyqqan Olımpıda chempıondary pikir bildirgen edi. Sondaı-aq Mıhaıl Shaıdorov jalaqy daýyna qatysty málimdeme jasady.
