Osyndaı jaǵdaıda Reseı Federasııasynyń Prezıdenti Vladımır Pýtınniń Qazaqstanǵa memlekettik sapary tek ekijaqty qatynastar sheńberindegi oqıǵa emes, Eýrazııalyq keńistiktegi qazirgi saıası jáne ekonomıkalyq úrdisterdi baǵalaýǵa múmkindik beretin mańyzdy oqıǵa retinde qarastyrylýǵa tıis.
Kóp jaǵdaıda halyqaralyq saıasattaǵy mańyzdy kezdesýler olardyń hattamalyq rásimderimen nemese qol qoıylǵan qujattardyń sanymen baǵalanady. Alaıda memleketaralyq qatynastardyń shynaıy mazmuny kóbine saıası sıgnaldardan, strategııalyq basymdyqtardan jáne uzaq merzimdi maqsattardan kórinedi. Astanadaǵy kelissózderdiń basty ereksheligi de osynda boldy.
Qazaqstan táýelsizdik alǵan kúnnen bastap syrtqy saıasatta teńgerimdi jáne pragmatıkalyq baǵyt ustanyp keledi. Bul ustanym ártúrli kezeńderde túrlishe baǵalanǵanymen, búgingi kúni onyń ómirsheńdigi men tıimdiligi aıqyn kórinip otyr. Qazirgi álemde kóptegen memleketter geosaıası qarama-qaıshylyqtardyń arasynda tańdaý jasaýǵa májbúr bolsa, Qazaqstan ulttyq múddelerge negizdelgen kópvektorly saıasatty saqtap qaldy. Bul – kezdeısoq jetistik emes, uzaq jyldar boıy qalyptasqan dıplomatııalyq mádenıettiń nátıjesi.
Reseı Qazaqstannyń eń iri kórshisi ǵana emes, sondaı-aq tarıhı, ekonomıkalyq jáne gýmanıtarlyq turǵydan tyǵyz baılanysqan memleketterdiń biri. Álemdegi eń uzyn qurlyqtyq shekaranyń bolýy, ónerkásiptik kooperasııanyń qalyptasqan júıesi, kólik ınfraqurylymynyń ózara baılanysy jáne mıllıondaǵan adamdar arasyndaǵy adamı qatynastar eki eldiń qarym-qatynasyna erekshe sıpat beredi. Sondyqtan Qazaqstan men Reseı arasyndaǵy yntymaqtastyqty jekelegen saıası oqıǵalar nemese qysqa merzimdi konıýnktýra arqyly baǵalaý jetkiliksiz.
Búginde Qazaqstan–Reseı qatynastary jańa kezeńge aıaq basyp otyr. Eger buryn ekijaqty kún tártibinde negizinen saýda, energetıka nemese qaýipsizdik máseleleri basym bolsa, qazirgi jaǵdaıda tehnologııalyq damý, sıfrlandyrý, jasandy ıntellekt, logıstıka jáne adamı kapıtal máseleleri aldyńǵy qatarǵa shyǵa bastady.
Sapar barysynda talqylanǵan máselelerdiń aýqymy dál osy ózgeristerdi kórsetti. Energetıka burynǵysynsha mańyzdy baǵyt bolyp qala beredi. Munaı men gaz salasyndaǵy yntymaqtastyq, tranzıttik ınfraqurylym, ónerkásiptik jobalar eki memlekettiń ekonomıkalyq baılanystarynyń negizin quraıdy. Degenmen qazirgi jaǵdaı energetıkalyq seriktestikti tek tabıǵı resýrstarmen baılanysty qarastyrýdyń jetkiliksiz ekenin kórsetip otyr. Búgingi kúni energetıkalyq qaýipsizdik uǵymy tehnologııalyq táýelsizdikpen, ınfraqurylymdyq turaqtylyqpen jáne ınnovasııalyq sheshimdermen tyǵyz baılanysty.
Osy turǵydan alǵanda atom energetıkasy salasyndaǵy yntymaqtastyqqa erekshe nazar aýdaryldy. Álemdik tájirıbe kórsetkendeı, atom energetıkasy tek elektr energııasyn óndirý quraly emes, ǵylymı-tehnologııalyq áleýetti damytýdyń, ınjenerlik mektepterdi qalyptastyrýdyń jáne joǵary tehnologııalyq óndiristerdi ilgeriletýdiń mańyzdy faktory bolyp tabylady. Sondyqtan bul saladaǵy kez kelgen joba uzaq merzimdi strategııalyq mánge ıe.
Kelissózderdiń taǵy bir mańyzdy baǵyty – kólik jáne logıstıka máseleleri boldy. Qazirgi álemde memleketterdiń básekege qabilettiligi kóbine olardyń geografııalyq ornalasýyna emes, sol artyqshylyqtardy qanshalyqty tıimdi paıdalana alýyna baılanysty. Qazaqstannyń Eýrazııa qurlyǵynyń dál ortasynda ornalasýy elge erekshe múmkindik beredi. Biraq bul múmkindikti naqty ekonomıkalyq nátıjege aınaldyrý úshin zamanaýı ınfraqurylym, tıimdi logıstıka jáne halyqaralyq seriktestik qajet.
