«Hırýrgııanyń ózekti máseleleri» taqyrybynda ótken plenýmǵa Densaýlyq saqtaý vıse-mınıstri Tımýr Muratov, Abaı oblysynyń ákimi Berik Ýálı, sondaı-aq otandyq jetekshi hırýrgtar men qazirgi zamanǵy medısına salasynyń sarapshylary qatysty.
«Elimizde jyl saıyn 250–300 myńnan astam hırýrgııalyq operasııa jasalady, onyń ishinde jekemenshik klınıkalardaǵy operasııalar da bar. Bul rette joǵary tehnologııalyq medısınalyq kómektiń úlesi aıtarlyqtaı artyp keledi. Zamanaýı az ınvazıvti tehnologııalar, laparoskopııalyq jáne endoskopııalyq emdeý ádisteri sátti engizilýde, sondaı-aq kardıohırýrgııa, neırohırýrgııa jáne transplantologııa salalary belsendi damyp keledi», – dedi Muratov.
Hırýrgııalyq beıindegi kadrmen qamtamasyz etý 1666 mamandy quraıdy. Kadrlyq áleýetti damytýǵa erekshe kóńil bólinýde. 2026 jyly 400-den astam jas dárigerdi shyǵarý josparlanýda.
Osy baǵytta Qazaqstannyń medısına ýnıversıtetteri men ǵylymı ortalyqtary mamandar daıarlaýda halyqaralyq standarttardy belsendi engizip, sheteldik klınıkalar jáne ǵylymı uıymdarmen yntymaqtastyqty keńeıtýde.
Plenýmnyń sheńberinde jalpy, abdomınaldyq, tamyrlyq, torakaldyq jáne shuǵyl hırýrgııanyń ózekti máseleleri, zamanaýı tehnologııalardy engizý, medısınalyq kómektiń sapasyn arttyrý jáne óńiraralyq kásibı yntymaqtastyqty damytý máseleleri keńinen talqylandy.
Densaýlyq saqtaý mınıstrliginiń mańyzdy baǵyttarynyń biri – óńirler men aýyldyq jerlerde mamandandyrylǵan hırýrgııalyq kómektiń qoljetimdiligin arttyrý bolyp qala beredi.
