Qazaqstannyń 6 oblysynda jasyl tehnologııalar ortalyǵy ashyldy

Qazaqstannyń 6 oblysynda jasyl tehnologııalar ortalyǵy ashyldy, dedi Ortalyq kommýnıkasııalar qyzmetinde ótken baspasóz máslıhatynda «Jasyl ekonomıkany qoldaý men G-Global-dy damytý Koalısııasy» ZTB basqarma tóraıymy Saltanat Raqymbekova. «2016 jyldyń úlken jetistikteriniń biri Qaraǵandy, Qostanaı, Almaty, Jambyl, Pavlodar, Soltústik Qazaqstan oblystarynda jasyl tehnologııalar ortalyqtarynyń ashylýy boldy», - dedi ol. 2017 jyly Koalısııa Aqmola oblysy Arshaly aýdanynyń aýyldarynda aýyl kooperatıvterin qurýǵa kirisip ketti. EKSPO-2017 qonaqtary men týrısterdiń tamashalaýyna arnalǵan ózge de obektiler. Bular – Qazaqstannyń alǵashqy jasyl aýyly – Arnasaı, «EXPO Camp» jastardyń «jasyl» lageri, Arnasaıdaǵy qonaqtarǵa arnalǵan eko-úıler, «Saryjaılaý» jasyl eko-etnoaýyly, qoqys óńdeı otyryp, gaz, jylý, elektr energııasyn jáne tyńaıtqysh alatyn Qazaqstandaǵy alǵashqy aýyldaǵy zaýyt. Onlaın-EKSPO-2017 konkýrsy men ekologııalyq tatý bıznes konkýrsynyń nátıjeleri boıynsha Koalısııa áriptesterimen birlesip otandyq úzdik «jasyl» tehnologııalar men ınnovasııalardy iriktep alady, bıznesti ónertabystaryn «Arnasaı» JTO-ǵa ornatýǵa, onyń ishinde EKSPO -2017 halyqaralyq kórmesine kelýshilerge tanystyrýǵa shaqyrady. Koalısııa áriptesterimen birlesip «Saryjaılaý» eko-etnoaýylyn qurý jobasyn ázirledi. Onda ashyq aspan astynda qazaqstandyq ınnovatorlar men ónertapqyshtardyń, «Online EXPO-2017» konkýrsy laýreattarynyń eksponattaryn ornalastyrý josparlanyp otyr. Taǵy bir jarqyn joba Arnasaıdaǵy «EXPO Camp» jastardyń «jasyl» lageri bolyp tabylady. Lager qurýdyń maqsaty – elderdiń balalary men jastary arasynda halyqaralyq, ekologııalyq, etnografııalyq, praktıkalyq jáne zııatkerlik demalys pen tájirıbe almasýdy damytý, salaýatty ómir saltyn nasıhattaý, qorshaǵan ortany qorǵaý, «jasyl» tehnologııalardy paıdalaný.