Qazaqstanda biryńǵaı eksport strategııasy ázirlenedi

Qazaqstan Prezıdenti óziniń Joldaýynda atap ótkendeı, búginde Úkimet aldynda 2025 jylǵa qaraı shıkizattyq emes eksportty 2 ese ulǵaıtý mindeti tur. Al bul baǵyttaǵy jumysty jandandyrý úshin Elbasynyń atap ótýinshe, eksportty damytý men ilgeriletý tetikterin bir vedomstovaǵa shoǵyrlandyrý qajet. Eksporttaýshylarǵa «bir tereze» qaǵıdaty boıynsha óńirlerde de qoldaý kórsetý kerek. «Úkimet janynan Eksport saıasaty jónindegi keńes qurýdy tapsyramyn. Oǵan bıznes qoǵamdastyǵynyń ókilderi kirýge tıis. Bıylǵy 1 qyrkúıekke deıin Úkimet ákimdermen jáne bıznes ókilderimen birlesip, Biryńǵaı eksport strategııasyn ázirleýi kerek. Qazaqstan shetel ınvestısııalaryn tartý isindegi kóshbasshylyǵyn saqtap qalýy qajet. «Astana» halyqaralyq qarjy ortalyǵy el ekonomıkasyna qarjy resýrstaryn tartýda mańyzdy ról atqarýǵa tıis. Biz taýar óndirý men ótkizý, qyzmet kórsetý isin jahandyq jelige beıimdeýimiz kerek. Muny, eń aldymen, transulttyq kompanııalardy tartý arqyly jasaǵan jón», – dedi N.Nazarbaev. Memleket basshysynyń aıtýynsha, Qazaqstanda óndirister ashý jónindegi Qytaımen birlesken ınvestısııalyq baǵdarlamany tıimdi júzege asyrý kerek. «Qytaı tarapymen ýaǵdalastyqqa qol jetkizildi. Nysandar belgilendi. Naqty jumys isteý qajet. Bul qazaqstandyqtar úshin 20 myń jańa jumys ornyn ashatyn zamanaýı óndiris bolmaq. Qazir 6 joba júzege asyryla bastady, al 2 joba iske qosyldy. Sonyń biri – gıbrıdtik jáne tolyqtaı elektrli JAC avtomobılderin iri qurylǵylardan qurastyratyn zaýyt. Qajetti ınfraqurylym qalyptastyrý jaıyn eskerip, eksportqa baǵdarlanǵan elektromobıl óndirisin odan ári damytý máselesin pysyqtaýdy tapsyramyn. Tutastaı alǵanda, Qazaqstannyń óz Investısııalyq strategııasy bolýǵa tıis. Úkimet ony bıylǵy 1 qyrkúıekke deıin ázirleýi kerek. Halyqaralyq yntymaqtastyq aıasynda ulttyq ekonomıkalyq múddelerdi qorǵap, ilgeriletý qajet. Bul, eń aldymen,  EAEO, ShYU ishinde Jibek joly Ekonomıkalyq beldeýimen ushtasatyn jumystarǵa qatysty. Ol úshin ekonomıkalyq dıplomatııa jumysyn qaıta quryp, jandandyra túsý qajet», – dep túıdi Prezıdent.