Parlament Májilisiniń depýtattary, Konstıtýsııalyq komıssııa músheleri, qoǵam belsendileri, akademıkter men jetekshi ǵalymdar qatysqan basqosýda jańa Konstıtýsııa jobasy aıasynda ǵylym, bilim, adamı kapıtal jáne ınnovasııany memleket damýynyń strategııalyq ózegine aınaldyrý máselesi saralandy. Ásirese qazirgi zamanǵy syn-qaterler jaǵdaıynda konstıtýsııalyq normalardy jańartý memleket damýyndaǵy tarıhı kezeń ekeni aıtyldy.
Is-sharany júrgizgen Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev Konstıtýsııa jobasynda adamı kapıtaldy, ǵylym men ınnovasııalardy damytý, alǵash ret memleket qyzmetiniń strategııalyq baǵyty retinde anyqtalyp otyrǵanyn, jańa konstıtýsııalyq model – eldiń bolashaǵyna baǵyt-baǵdar beretin damýdyń zııatkerlik kartasy bolatynyn atap ótti.
Talqylaý aıasynda Májilis depýtaty Aıdos Sarym konstıtýsııalyq jańǵyrýdyń mánin qoǵamnyń naqty suranystarymen, sonyń ishinde bilim, ǵylym jáne ınnovasııany damytý mindetteri turǵysynan zerdeleý qajettigin, reformanyń ashyqtyǵy men qoǵamdyq talqylaýyn kúsheıtý arqyly ǵylymı qaýymdastyqtyń, sarapshylardyń únin estýge múmkindik berý – ǵylymǵa negizdelgen saıasattyń mańyzdy alǵysharty ekenin jetkizdi.
Májilis depýtaty Janarbek Áshimjan konstıtýsııalyq reformalar qoǵamnyń uzaq merzimdi damý múddelerimen, sonyń ishinde bilim men ǵylym salalarynyń strategııalyq rólimen úndes ekenin aıtsa, A.Baıtursynuly atyndaǵy Til bilimi ınstıtýtynyń dırektory Anar Fazyljan konstıtýsııalyq jańǵyrýdyń mazmunyn til saıasatynyń strategııalyq mańyzyn, sonyń ishinde memlekettik tildiń ǵylym, bilim jáne qoǵamdyq kommýnıkasııa keńistigindegi rólimen sabaqtastyra pikir bildirdi.
Ádil eńbek, qaýipsiz jumys, laıyqty jalaqy: Maksım Rojın jańa Konstıtýsııanyń mańyzdy tusyn atady
Jıynda ǵalymdar adamı kapıtaldy damytý memlekettiń strategııalyq turaqtylyǵy men órkendeýiniń basty tiregi ekenin, osyǵan oraı ǵylymı qaýymdastyq jaýapkershilikti jiti sezinip, Konstıtýsııalyq reformalar boıynsha túsindirý jumystaryna belsendi ún qosatyndaryn atap ótti.
Konstıtýsııalyq komıssııada jańa Ata Zańdy búkilhalyqtyq referendýmǵa shyǵarý usynyldy
Aqylbek Kúrishbaevtyń aıtýynsha, áleýmettik jelilerde keıbir azamattar Konstıtýsııa jobasy mátinin muqııat oqymaı, sońyna deıin túsinbeı ártúrli negizsiz aqparattar taratyp jatyr.
«Osy jaǵdaıdy eskere otyryp, elimizge eńbegi sińgen kórnekti ǵalymdar, onyń ishinde Qazaqstannyń Eńbek Erleri bar akademıkter konstıtýsııalyq reformalarǵa qatysty óz ustanymyn ashyq bildirip, qoǵamdyq pikirge ún qosýdy uıǵardyq», degen Akademııa basshysy ǵylymı qaýymdastyqtyń úndeýin jetkizdi.
