Joǵary bilim berý júıesi sapasyna erekshe nazar aýdarylady - Elbasy

Prezıdent Nursultan Nazarbaev halyqqa arnaǵan bıylǵy Joldaýynda eń aldymen bilim berý júıesiniń róli ózgerýge tıis ekenin aıtty. Sonymen qatar oqytý baǵdarlamalaryn synı oılaý qabiletin jáne óz betimen izdený daǵdylaryn damytýǵa baǵyttaý qajet. Sonymen birge, IT-bilimdi, qarjylyq saýattylyqty qalyptastyrýǵa,  ultjandylyqty damytýǵa basa kóńil bólý kerek. Qala men aýyl mektepteri arasyndaǵy bilim berý sapasynyń alshaqtyǵyn azaıtý qajet. «Úkimetke tıisti usynystar berýdi tapsyramyn. Atap aıtqanda, úsh tildi oqýǵa kezeń-kezeńmen kóshý máselesi boıynsha usynystar ázirlensin. Qazaq tiliniń basymdyǵy saqtalady. Onyń ári qaraı damýyna zor kóńil bólinedi. Sonymen qatar, búginde aǵylshyn tili - jańa tehnologııa, jańa ındýstrııa, jańa ekonomıka tili. Qazirgi kezde 90% aqparat aǵylshyn tilinde jarııalanady. Árbir eki jyl saıyn olardyń kólemi 2 ese ulǵaıyp otyrady. Aǵylshyn tilin meńgermeı, Qazaqstan jalpy ulttyq progreske jete almaıdy. 2019 jyldan bastap 10-11 synyptarda keıbir pánderdi aǵylshyn tilinde oqytatyn bolamyz. Bul máseleni tııanaqty oılanyp, aqylmen sheshý qajet», - dedi Prezıdent. Prezıdenttiń aıtýynsha, qazir mektepterdiń jáne muǵalimderdiń deńgeıi, ásirese aýyl men qalada ártúrli. Bilikti pedagogtardyń jetispeý problemasy da bar. Osyny eskerip, aǵylshyn tilin kezeń-kezeńimen engizý kerek. Bıyl Elbasynyń bastamasy boıynsha «Barshaǵa arnalǵan tegin kásiptik-tehnıkalyq bilim berý» jobasy iske asyryla bastady. "Tegin oqytýmen eń áýeli jumyssyz jáne ózin ózi tıimsiz jumyspen qamtyǵan jastar, sondaı-aq kásiptik bilimi joq eresek adamdar qamtylýy tıis. Kásiptik bilim berý júıesinde, men aıtqandaı, ekonomıkadaǵy jańa óndirister úshin mamandar daıyndaýǵa den qoıý kerek. «Ol úshin kásiptik standarttar eńbek naryǵynyń talaptaryna jáne eń úzdik álemdik oqý-óndiristik tájirıbelerge sáıkes jańartylýy qajet. Sonymen qatar, joǵary bilim berý júıesi sapasyna erekshe nazar aýdarylady. Joǵary oqý oryndarynyń kadrlyq quramyna, materıaldyq-tehnıkalyq jabdyqtalý deńgeıine, bilim berý baǵdarlamalaryna qatysty baqylaý men talap kúsheıtilýi qajet", - dedi Nazarbaev.