Keıbir salalardaǵy satyp alý ádisterin qaıta qarastyrý kerek - Prezıdent

Elimizdegi sybaılas jemqorlyq deńgeıin tómendetý baǵytynda eleýli qadamdar jasaldy. Alaıda, basty nazar kóbine sybaılas jemqorlyqtyń saldarlarymen kúresýge aýdarylyp otyr. Bul týraly búgin jarııalanǵan Prezıdent Nursultan Nazarbaevtyń el halqyna arnaǵan Joldaýynda aıtylǵan. «Sybaılas jemqorlyqtyń sebepteri men alǵysharttaryn anyqtap, olardy joıý jumysyn kúsheıtý qajet»,  - dedi Elbasy. Sonymen qatar Nursultan Nazarbaev sybaılas jemqorlyqpen kúreste kóp nárse búkil qoǵamnyń belsene atsalysýyna baılanysty ekenin aıtty. «Áleýmettik jeliniń, ózge de medıa-resýrstardyń damýy jaǵdaıynda, sybaılas jemqorlyqqa qarsy is-áreket barysynda ony jalpy jurtshylyqtyń jek kórýi kúrestiń qýatty quralyna aınalýǵa tıis», - dedi Qazaqstan Prezıdenti. Sonymen qatar Elbasy Joldaýda satyp alý salasyn jetildirýge basa nazar aýdarǵan. «Úkimetke memlekettik satyp alý júıesin ortalyqtandyrylǵan qyzmet qaǵıdaty boıynsha engizýdi tapsyramyn. Kvazımemlekettik sektorda, tabıǵı monopolııa jáne jer qoınaýyn paıdalaný salalarynda da satyp alý sharalaryn ótkizý ádisterin túbegeıli qaıta qarastyrý kerek», - dep atap ótti Memleket basshysy.