2030 jylǵa deıin Almaty janynan jańa qala salynady

Almaty qalasynyń alǵashqy serik qalasy (Gate City) qurylysy 2030 jylǵa deıin aıaqtalady. Qala tórt bólikten turady, dep málimdedi búgin ınvestısııalar jáne damý mınıstriniń orynbasary Roman Sklıar. «Almaty oblystyq máslıhatynyń sheshimimen jobanyń tehnıkalyq-ekonomıkalyq negizi daıyndaldy. Qujatqa saı, Gate City qurylysy 2030 jylǵa deıin aıaqtalady», — dedi Roman Sklıar. Gate City qurylysynda jolaýshylar jáne júk aınalymynyń ishki jáne syrtqy retteýleri boıynsha transporttyq qyzmet, ındýstrııaldy aımaqtar men klasterler keshen, turǵyn úı-azamattyq keshenderi men ákimshilik-iskerlik jáne qoǵamdyq nysandar qamtylmaq. «Qazirgi tańda Almatynyń serik qalasy Gate City-ge ınjenerli-kommýnıkasııalyq ınfraqurylym tartylǵan. Sonyń ishinde sý, gaz jáne elektrmen qamtamasyz etilip tur. Endi jol men ınjenerlik jeliler tartý kerek. Sonymen qatar qýattylyǵy 200 Gkal/saǵat bolatyn qazandyq qurylysy aıaqtalyp qaldy», — dedi Roman Sklıar. Qujatqa saı, 2030 jylǵa deıin qala qurylysyna 650 mlrd teńge bólinedi. Sonyń ishinde bıýdjet qarjysy 206 mlrd bolsa, jeke qarjy 444 mlrd teńge. Mınıstr orynbasarynyń málimetinshe, 2008-2015 jyldar aralyǵynda 31,4 mlrd teńge bólingen. Al 2016 jyly jobaǵa qarjy bólinbegen. 2030 jyldan keıin osylaısha Almaty janynan Golden City, Growing City jáne Green City qalalary boı kótermek. Almaty janynan tórt serik qala salý týraly sheshim 2006 jyly qabyldanǵan edi. 2007 jylǵy prezıdenttiń sheshimimen 2008 jyly G4 City jobasy bastalǵan. Bul qalalar Almaty-Qapshaǵaı tas joly boıynda salynbaq.