Týǵan jeri – Qoskól aýylynda merekelik kesh ótti. Osy keshte 75 jasqa tolýyna oraı túsirilgen «Ulytaýǵa bardyń ba?» atty derekti fılmniń tusaýy kesildi. Fılmde kórermen Júrsin Ermannyń ómir jáne óner jolyndaǵy kóp derekke qanyq boldy.
Fılmde «Týǵan jerim Bulantynyń boıynda» dep áńgimesin bastaǵan Júrsin aqyn ata-baba qorymyna baryp, duǵa baǵyshtaıdy. Atasy Erman, áke-sheshesiniń talaıly taǵdyry, alǵashqy ustazy jóninde syr shertedi. Týǵan topyraǵynda ósetin jantaq shóbin ıiskep, balalyq shaǵy ótken Quljanbaı aýylyna arnaǵan óleńin oqıdy. Ápkesi Saqypjamal Moldashqyzy Júrsinniń bala kezindegi qylyqtaryn aıtyp, baýyrynyń shyǵarmalar jınaǵynan anasyna arnaǵan «Ertegi» degen óleńin oqıdy. Dosy, ǵalym Tursyn Jurtbaı aqynnyń jastaıynan kesek sóıleıtin, namysshyl bolǵanyn, Júrsinniń anasynyń qolynan dám tatqanyn jetkizedi. Belgili aıtysker aqyn Amanjol Áltaı otyz jyl boıy qasynda kele jatqan inisi retinde Júrsin aǵany jaqsy biletin adamnyń biri ekenin jetkizedi.
Belgili kompozıtor A.Qorazbaev: «Asanáli aǵanyń taǵdyry jóninde osydan on jyl buryn jolyǵyp, siz týraly án jazsam dep ruqsat suradym. Ol kisi ruqsatyn berdi. Ánge úsh jyl daıyndaldym. Sodan «Asanálige ýáde berip edim, sol án daıyn boldy» dep Júrsinge telefon soqtym. Jıyrma mınýtta «óleńniń sózin jazdym, daıyn boldy» dep Júrsin habarlasady. Ánnen sózi artyq dep aıtar edim», dep tolǵanady.
Derekti fılmde osyndaı shyǵarmashylyq jolynda kezdesken belgili tulǵalar jaıynda taǵylymdy derekter jeterlik. Muny kórgen mektep oqýshylary rýhanı azyq alyp qoımaı, aqyn atasynyń júrek tebirenter jyrlaryn jatqa aıtty.
Aýyldan bastaý alǵan merekelik kesh Ulytaý aýdanynda «Qara óleńniń qazyǵy, Ulytaýdyń abyzy» atty aımaqtyq Júrsin Erman oqýlaryna jalǵasty. Saıystyń talaby boıynsha aqynnyń eki óleńin mánerlep oqyp, keminde jıyrma óleńin jatqa aıtý kerek.
Saltanatty sharany Ulytaý aýdanynyń ákimi Amanjol Batyrbekuly ashyp berip, úmitkerlerge sáttilik tiledi.
Barlyǵy 19 úmitker qatysyp, jıyrmaǵa jýyq óleńin jatqa aıtty.
Bas júldeni Júrsin Ermannyń qyryq óleńin jatqa aıtqan Ulytaý aýdanynan qatysqan Aıjan Bımaǵanbetova (200 000 teńge) jeńip aldy.
I oryndy Qarsaqpaı kenti Darhan Esenbaev(180 000 teńge), II oryndy Jezdi kentinen Sara Erlanqyzy (150 000 teńge) ıelendi. III oryndy Jezqazǵan qalasynan Gaýhar Ǵabdúmálikqyzy jáne Júrsin Ermannyń týǵan aýylynan kelgen Erasyl Qanyshuly qanaǵat tutty. Ekeýine 100 000 teńge aqshalaı syılyq buıyrdy.
Barlyq qatysýshylarǵa alǵys hat pen 50 000 teńge kóleminde aqshalaı syılyq tabystaldy.
