«OLYMPIC GAMES 2026. SHORT TRACK» ataýymen jańa kolleksııalyq short-trekshiler qurmetine arnalady. Kolleksııalyq moneta 925 synamaly kúmisten daıyndalǵan. Onyń massasy – 20 gramm, dıametri – 37 mm. Daıyndaý sapasy – proof, nomınaly – 1000 teńge, al taralymy nebári 2 000 dana. Monetalar Qazaqstan teńge saraıynda soǵylǵan.
Satylym 18 aqpan 2026 jyldan bastap Ulttyq banktiń resmı ınternet-dúkeni arqyly júzege asyrylady. Monetanyń aversinde short-trekshiler beınesi bederlengen. Short-trek – konkımen júgirý sportynyń olımpıadalyq túri, ol 1992 jyldan beri qysqy Olımpıada oıyndarynyń baǵdarlamasyna engizilgen.
Ǵarysh aılaǵynyń mereıtoıyna arnalǵan «BAIQOŃYR – 70 JYL» monetasy tolyqtaı tantal metalynan jasalǵan. Onyń massasy – 100 gramm, dıametri – 50 mm, daıyndaý sapasy – proof, nomınaly – 2000 teńge. Taralymy – 500 dana.
Bul monetanyń aversinde ýltrakúlgin sáýlede kórinetin jasyryn beınelerdi qoldaný tehnologııasy paıdalanylǵan. Mundaı tásil kolleksııalyq qundylyqty arttyryp, qorǵanysh elementterin kúsheıtedi.
Ulttyq bank málimetinshe, atalǵan kolleksııalyq monetalar Qazaqstan aýmaǵynda óziniń belgilengen quny boıynsha tólemderdiń barlyq túrinde qabyldanady. Sondaı-aq eldiń barlyq bankterinde bank shottaryna esepke alýǵa, aýdarýǵa, usaqtaýǵa jáne aıyrbastaýǵa jaramdy.
Osylaısha, sport pen ǵarysh tarıhynyń mańyzdy belesteri endi metall betine qashalyp, nýmızmattar men kolleksıonerlerge usynyldy.
