«QazAvtoJol» ulttyq kompanııasy respýblıkalyq mańyzy bar avtojoldardyń aqyly ýchaskelerinde memlekettik tirkeý nómirlerin ádeıi jasyrǵan nemese jalǵan memlekettik nómir belgilerin paıdalanatyn kólik quraldaryna baqylaýdy kúsheıtti.
Mundaı zańbuzýshylyqtar kóbinese jol aqysyn tóleýden jaltarý jáne avtomatty baqylaý júıelerin aınalyp ótý maqsatynda jasalady. Alaıda mundaı áreketter qoldanystaǵy zań talaptaryna qaıshy ári jol-kólik oqıǵalary, jol qozǵalysy erejelerin buzý nemese ózge de tótenshe jaǵdaılar kezinde kólik quralyn sáıkestendirýdi qıyndatady.
Ekibastuzda kartonǵa markermen memlekettik nómir jazyp alǵan júrgizýshi ustaldy
2026 jyldyń basynan beri respýblıkalyq mańyzy bar avtojoldardyń aqyly ýchaskelerinde memlekettik tirkeý nómirlerin jasyrýdyń, ózgertip paıdalanýdyń nemese jalǵan nómirlerdi qoldanýdyń 1 942 deregi anyqtaldy.
Ulttyq kompanııa mamandary aqyly jol ýchaskelerinde turaqty monıtorıng júrgizýde. Osyndaı quqyq buzýshylyqtar anyqtalǵan jaǵdaıda barlyq materıaldar jedel túrde ishki ister organdaryna, onyń ishinde patrýldik polısııa bólimshelerine Qazaqstan zańnamasyna sáıkes shara qabyldaý úshin joldanady.
Ulttyq kompanııa memlekettik tirkeý nómirleri árdaıym taza, anyq kórinetin, belgilengen talaptarǵa sáıkes bolýy jáne arnaıy kózdelgen orynǵa ornatylýy tıis ekenin eske salady. Oqylmaıtyn, standartqa sáıkes kelmeıtin nemese durys ornatylmaǵan memlekettik nómirler úshin ákimshilik jaýapkershilik qarastyrylǵan.
1 shildeden bastap elektrosamokattarǵa memlekettik nómir beriledi
Al jalǵan nemese qoldan jasalǵan nómirlerdi paıdalaný, sondaı-aq olardy jasyrýǵa arnalǵan qurylǵylardy qoldaný zańnamaǵa sáıkes anaǵurlym qatań jaýapkershilikke, tipti kólik quralyn basqarý quqyǵynan aıyrýǵa deıin ákelýi múmkin.
«QazAvtoJol» ulttyq kompanııasy júrgizýshilerdi zań talaptaryn qatań saqtaýǵa, memlekettik tirkeý nómirlerin jasyrmaýǵa jáne aqyly avtomobıl joldary úshin tólemdi ýaqytyly tóleýge shaqyrady.
Joldaǵy tártip, jaýapkershilik pen ashyqtyq – barlyq jol qozǵalysyna qatysýshylardyń qaýipsizdigin qamtamasyz etetin basty qaǵıdattardyń biri.
