Foto: Ashyq derekkóz
QZ Economy Taldaý telgram arnasynyń málimetinshe, О́zbekstan Prezıdenti 26 mamyrda «Shaǵyn bıznes sýbektileriniń ósýine qolaıly ekonomıkalyq jáne ákimshilik jaǵdaılardy odan ári jaqsartý týraly» Jarlyqqa qol qoıdy. Qujatta kásipkerlikti qoldaýǵa baǵyttalǵan birqatar salyqtyq jańashyldyq qarastyrylǵan.
Eń mańyzdy ózgeristerdiń biri – shaǵyn bıznestiń jeńildetilgen salyq rejıminen jalpyǵa birdeı salyq salý tártibine ótý sheginiń ulǵaıýy. Buǵan deıin bul kórsetkish 1 mlrd sým bolsa, endi 5 mlrd sýmǵa deıin, ıaǵnı shamamen 200 mln teńgege jýyq deńgeıge kóterildi.
Bul kórsetkish bes ese artqanymen, Qazaqstandaǵy múmkindikpen salystyrǵanda aıtarlyqtaı tómen. Bıylǵy 1 qańtardan bastap jańartylǵan jeńildetilgen deklarasııa rejıminde tabys shegi 600 myń aılyq eseptik kórsetkishke, ıaǵnı shamamen 2,6 mlrd teńgege deıin jetedi. Buǵan qosa kásipkerler qosylǵan qun salyǵy men áleýmettik salyqtan bosatylady.
О́zbekstanda taǵy bir jańalyq – qoǵamdyq tamaqtaný, saýda jáne qyzmet kórsetý salasyndaǵy kásipkerler úshin qosylǵan qun salyǵyn tóleýdiń jeńildetilgen tártibin engizý. 1 maýsymnan bastap olar bul rejımdi erikti túrde paıdalana alady.
Jańa tártip boıynsha QQS mólsherlemesi aınalymnyń 6%-yn quraıdy. Al paıda salyǵy boıynsha 0% mólsherleme belgilenip, eseptilik tapsyrý mindeti joıylady. Degenmen kásipkerlerdiń kiris QQS-yn esepke alýyna, jeńildikter men qaıtarym alýǵa múmkindik berilmeıdi.
Qazaqstanda bul baǵytta basqa tásil qoldanylady. Jeńildetilgen deklarasııa negizindegi arnaýly salyq rejıminde kásipkerler tabys salyǵyn tóleıdi. Onyń bazalyq mólsherlemesi 4%, al jergilikti máslıhattardyń sheshimimen 2%-dan 6%-ǵa deıin ózgerýi múmkin. Bul rejımde QQS múlde qarastyrylmaǵan.
Sarapshylardyń pikirinshe, О́zbekstan tómendetilgen mólsherlemeler arqyly bıznesti bólshekteýge tosqaýyl qoıyp, kásipkerlerdi QQS júıesine erikti túrde tartýǵa umtylyp otyr. Al Qazaqstan bul kezeńnen ótip, salyqtyq baqylaýdy tolyq sıfrlandyrýǵa kóshken.
Máselen, elimizde QQS ákimshilendirý elektrondy shot-faktýralar men baqylaý-kassa mashınalary arqyly júzege asady. Sonymen qatar jeńildetilgen rejımdi qoldanatyn kásiporyndarmen ózara esep aıyrysý kezinde shegerimderge qoıylatyn shekteýler de bar.
QQS ákimshilendirý máselesinde de eki eldiń ustanymy ártúrli. О́zbekstan salyqty qaıtarý rásimderin avtomattandyrýǵa kirisip jatyr. Kelesi jyldan bastap táýekeli tómen kásipkerlerge QQS avtomatty túrde qaıtarylmaq. Alaıda qaıtarylatyn soma 10 mln sýmnan nemese shamamen 425 myń teńgeden aspaıdy.
Sondaı-aq bıylǵy qazan aıyna deıin elektrondy shot-faktýralar men salyq eseptiligine negizdelgen naqty ýaqyt rejımindegi avtomatty qaıtarý júıesin engizý josparlanǵan.
Al Qazaqstanda QQS tóleýshi kýáligi bıyldan bastap tolyq joıylyp, esep júrgizý elektrondy tizilim arqyly júzege asyrylady. Bul salyqtyq rásimderdi ońaılatyp, ákimshilik kedergilerdi azaıtýǵa múmkindik berdi.
Jalpy sarapshylardyń baǵalaýynsha, О́zbekstan salyq júıesin jańǵyrtý baǵytynda belsendi qadam jasap jatqanymen, shaǵyn jáne orta bıznesti qoldaý tetikteri, sıfrlyq ákimshilendirý deńgeıi men jeńildikter kólemi jaǵynan Qazaqstan ázirge basymdyqty saqtap otyr.
Buǵan deıin Astanada Memleket basshysy Qasym-Jomart Toqaevtyń jáne О́zbekstan Prezıdenti Shavkat Mırzııoevtiń qatysýymen Saýda-ekonomıkalyq yntymaqtastyq jónindegi jol kartasyna qol qoıý rásimi ótkenin habarlaǵanbyz.
