Foto: Erlan OMAR/ Egemen.kz
Ádette qabyldaýlar men resmı jıyndar ótetin Prezıdent rezıdensııasy bul joly balalarǵa esigin aıqara ashty. Respýblıkanyń túkpir-túkpirinen Aqordany aralaýǵa múmkindik alǵan órender arasynda pán olımpıadalarynyń jeńimpazdary men júldegerleri, oqý ozattary, shyǵarmashylyq baıqaýlardyń laýreattary, sport saıystarynyń saıypqyrandary bar.
Qorjyny jetistikke toly jetkinshekterdiń biri záýlim ǵımarattyń sáýletine tamsana kóz tastasa, endi biri ishin aralaýǵa asyqty. Toptan ilgeri júrip, ǵımarattyń aıbynyna tańdanyspen qaraǵan Ersultan Tóleýǵazyuly bul sáttiń ózi úshin úlken mártebe ekenin aıtty.
«Prezıdent saraıyn jaqynnan kórý múlde bólek sezim. Ájeptáýir úlken eken. Bul jerge kelý men úshin mártebe. Bolashaqta osynda qyzmet etkim keledi», dep bala kóńil aǵynan jaryldy.
Bir-biriniń izin basyp, toptasqan balalar aldymen rezıdensııa aýmaǵyndaǵy baqta serýendedi. Mundaǵy janǵa saıa jasyl-jelektiń alýan túrinen bólek, asyl tuqymdy qazaq tazylary men kitap oqyp otyrǵan bala músini oqýshylardyń nazaryn aýdardy. Ulttyq qundylyǵymyz ben bilimge qushtarlyqty úndestirgen beınelerdi ekskýrsovod Marjan Myrzabekova egjeı-tegjeı túsindirdi.
«Bul baq – ózindik tereń maǵynasy bar mádenı keńistik. Mundaǵy kitap oqyp otyrǵan bala músini – óskeleń urpaqtyń bilimge, ǵylymǵa degen qushtarlyǵyn sıpattaıdy. Al qazaq tazylary – bizdiń zamanǵa deıin jetken ulttyq rámizderimiz, jeti qazynanyń biri. Memleket basshysynyń rezıdensııasynda bul qundylyqtardyń ulyqtalýy – eldiktiń, tarıhqa degen qurmettiń jáne jarqyn bolashaqqa degen senimniń belgisi. Sizder sııaqty zerek te daryndy balalardyń osy qundylyqtardy sezinip óskeni mańyzdy», deıdi PIB Prezıdenttik ortalyǵynyń aǵa sarapshysy Marjan Myrzabekova.
Ári qaraı jetkinshekter Aqordaǵa qadam basty. Saraı ishindegi bıik munaralar men ulttyq naqyshtaǵy bezendirýler, jarqyraǵan shamdar, kóz tartar kartınalar oqýshylardy taǵy bir tamsandyrdy. Mármár zalyna kirgen sátte mektep oqýshylary birneshe mınýtqa resmı delegasııa múshelerine aınala ketti. Olar memlekettik Eltańba beınelengen qos papkany qoldaryna alyp, beıne bir kelissózder sátti aıaqtalyp, asa mańyzdy qujatqa qol qoıylǵandaı keıip tanytty. Barynsha baısaldy otyratyn bul orynda balalar bas qosqan kórinis rezıdensııa zalyna erekshe bir jylylyq bergendeı boldy.
Kıiz úı túrine oraılastyrylǵan Shyǵys zalynyń shyraıynan shabyttanǵan jas daryn Sultan Qaraǵul Qazanǵaptyń «Qus qaıtarý» kúıin naqyshyna keltire oryndady. Qasıetti qara dombyranyń únine uıyǵan qatarlastary jas talantqa rızashylyqpen qol shapalaqtady.
««Er Edige» jyr mektebiniń shákirtimin. Naýryz aıynyń ortasynda álemdi tańdaı qaqtyrǵan biregeı rekord ornattyq. Mekteptiń ónerli balalarymen birge 24 saǵat boıy toqtaýsyz Paıǵambarlar qıssasyn jáne «Qyrymnyń qyryq batyry» epopeıasyn jyrladyq. Bul tarıhı marafonda 36 bala kezek-kezek almasyp, qıssa oryndadyq. Osy qajyrly eńbektiń nátıjesinde «Er Edige» jyr mektebi Azııa men Afrıka elderiniń álemdik rekordtar kitabyna endi», deıdi talantty jas.
Baıqasaq, balalar Qurmet qaraýyly postynyń janyna kelgende uzaq bógelipti. Olardy «Adam qalaı tapjylmaı, uzaq ýaqyt boıy kirpik qaqpastan tik tura alady?» degen oı mazalaǵany anyq. Muny ańǵarǵan ekskýrsovod Marjan Myrzabekova jyly jymıyp, sarbazdardyń bul sheberligi jyldar boıǵy qajyrly daıyndyq pen temirdeı tártiptiń nátıjesi ekenin aıtyp berdi.
Odań soń, balalar Prezıdenttiń joǵary deńgeıdegi keńester, mınıstrler men vedomstvo basshylary, eldiń shyǵarmashylyq ókilderimen bas qosatyn Kúmbezdi zalyna bettedi. Záýlim kúmbezdiń astynda turyp, memlekettik mańyzy bar oqıǵalardyń aýqymyn sezingen órenderdiń tańdanysynda shek bolmady.
Budan soń, oqýshylar Memleket basshysynyń kitaphanasymen tanysty. Tóbege deıingi bıik sóreler, ondaǵy kitaptar, ortadaǵy úlken dóńgelek ústel jyly atmosfera syılady. Osy oraıda Aqtóbe oblysynan kelgen Káýsar Nurlanqyzyn áńgimege tarttyq.
«Astanaǵa barasyń degende, qýanyshym qoınyma syımady. Aqorda ádemi ári záýlim eken. Maǵan mundaǵynyń bári, mańyzdy kezdesýler men halyqaralyq jıyndar ótetin zaldardyń sáýleti, ulttyq naqyshtaǵy bezendirilýleri qatty unady. Ásirese osy kitaphana ishi jaıly eken. Saraıdyń ishi-syrtynda da baqtar bar. Men Otanymdy óte jaqsy kóremin jáne árqashan týǵan elimmen maqtanamyn. Otandy súıý – ol adamdarǵa kómektesý jáne jerińe qamqor bolý. Sondyqtan bolashaqta dáriger bolýdy armandaımyn», deıdi Káýsar.
Keıin balalarǵa merekelik dastarqan jaıyldy. Olar kórgen zaldarynyń ásemdigin talqylap, erekshe sátterimen bólisti. Arasynda Batys Qazaqstan oblystyq «Mahambet oqýlary», «Jyr jazamyn júregimnen», «Ult rýhynyń shamshyraǵy – Ahmet», «Ábish oqýlary» júldegeri, Á.Moldaǵulova atyndaǵy mektep-lıseıiniń oqýshysy Qaısar Amangeldi óz shyǵarmashylyǵynan elge arnaýyn oqyp berdi.
«Qazaqstan – Otanym ystyq maǵan!
Astanam jas baladaı jalyndaǵan.
Babamnan qalǵan mynaý baıtaq dala.
Amanat bop qalǵandaı myna maǵan.
Biz eldiń bolashaǵy tiregimiz,
«Qazaqstan» dep soǵar júregimiz.
Táýelsizdikti ańsap ketken babalarym,
Bolashaqqa amanatty jetkizý tilegimiz.
Qýanamyz, kúlemiz, shattanamyz,
Besiginde áldılep baqtanamyz,
Biz jastar erteńgi eldiń bolashaǵy
Qazaqstan senimen maqtanamyz!»
Osylaısha jetkinshekter Qazaqstan tarıhy týraly jan-jaqty málimet alyp, Táýelsizdik qundylyqtarynyń mańyzyna boılady. Ekskýrsııa sońynda balalarǵa Prezıdent atynan estelik syılyqtar tabystaldy.
