Sońǵy ýaqytta Astanada jyly aıaldamalardy qasaqana búldirý derekteri jıilegen. Belgisiz tulǵalar áınekterdi syndyryp, esikterdi jáne ózge de múlikti zaqymdap jur. Osyǵan baılanysty qala ákimdigi men polısııa beınebaqylaý júıesiniń múmkindikterin keńeıtý jáne naqty ýaqyt rejıminde baqylaýdy kúsheıtý boıynsha sharalar qabyldady.
Jyly aıaldamalarǵa ornatylǵan kameralar kezeń-kezeńimen polısııa departamentiniń Jedel basqarý ortalyǵyna qosylyp jatyr. Bul jańashyldyqtyń arqasynda polısııa qyzmetkerleri onlaın-monıtorıng júrgizip, quqyq buzýshylyqtarǵa jedel áreket ete alady.
Qazirgi tańda júıege negizinen Saraıshyq jáne Almaty aýdandarynda ornalasqan 20 aıaldama qosylǵan. Barlyq jyly aıaldamalardyń beıneaǵyndaryn biriktirý jumystaryn aqpan aıynyń sońyna deıin aıaqtaý josparlanyp otyr.
Jobany iske asyrý qoǵamdyq qaýipsizdik deńgeıin arttyrýǵa, qalalyq múliktiń saqtalýyn qamtamasyz etýge jáne vandalızm úshin jaýapkershiliktiń bultartpastyǵy qaǵıdatyn qalyptastyrýǵa múmkindik beredi.
Polısııa qyzmetkerleri qalalyq ınfraqurylym – bul jaı ǵana shyny men metaldan jasalǵan qurylymdar emes, turǵyndardyń qolaılylyǵy, qaýipsizdigi men jaılylyǵy úshin jasalǵan ortaq keńistiktiń bir bóligi ekenin eske saldy.
«Mundaı áreketter qala kelbetine ǵana emes, barlyq turǵyndarǵa zııan keltiredi. О́z qalańa uqypty qaraý – ózgelerge jáne ózińe degen qurmettiń belgisi», dedi polısııa.
