Bilim jáne ǵylym mınıstri Erlan Saǵadıev vedomstvo alqasynda bıylǵy jyly Qazaqstannyń barlyq mektepterinde júzege asyrylýy tıis basty mindetterdi atap ótti.
«Búgingi tańda mektepterdiń 99%-ynda Internetke qoljetimdilik bar. Kem degende sekýndyna 4 Mbıt kerek bolsa, bizde mektepterdiń 40%-ǵa jýyǵy onymen qamtamasyz etilgen. «Sıfrlyq Qazaqstan» birinshi kezekte Internetti mektepterge ornatady. Úkimet aldaǵy ýaqytta osy máseleni sheshedi dep senemiz. Alaıda, mektepterdegi qurylymdyq kabeldik júıe – úlken problema. WI-FI árbir kabınette bolýy tıis», – dedi QR BǴM basshysy. Bul týraly strategy2050.kz jazady.
Mınıstrdiń aıtýy boıynsha, olar osy naryqty taldap, ol qoljetimdi ári qymbat emes degen qorytyndyǵa keldi.
«Ákimdikterge mektepterdiń qarjylandyrylýyn qamtamasyz etý kerek, ol bir mektepke 700 myń teńgege jýyq. Kabelderdi ótkizý qajet. Oqý jylynyń basyna qaraı bul másele Qazaqstannyń barlyq mektepterinde sheshiledi », – dep atap ótti E. Saǵadıev.
Sondaı-aq, mınıstr mektepterdegi kompıýterlerdiń jetispeýshiligi problemasyn da aıtyp ótti.
«Biz ákimdikterge kompıýtermen qamtamasyz etýde kómektesýimiz kerek. Ony ásirese aýyldy jerlerde qamtamasyz etý qajet », – dedi ol.
E. Saǵadıev sondaı-aq muǵalimderge olarǵa tán emes fýnksııalardy oryndaýǵa tyıym salýǵa shaqyrdy.
«Muǵalimderge olarǵa tán emes fýnksııalardy oryndaýǵa tyıym salý – mańyzdy mindet. Ony qolǵa alý qajet. Birinshi kezekte, statıstıkalyq derekterdi jınaýdan bastaý qajet. Búginde bul másele talqylanyp jatyr», – dep málimdedi mınıstr.
Alqa otyrysynda barlyq mektepterde oqýshylardyń jeke shkaftary ornatylatyny týraly da belgili boldy.
