Azıada-2017. Hokkeıden Qazaqstan quramasy Qytaıdy oısyrata jeńdi

Japonııanyń Sapporo qalasynda ótip jatqan VIII qysqy Azııa oıyndarynda erler arasynda hokkeıden Qazaqstan quramasy Qytaıdy 8:0 esebimen jeńdi. Jerlesterimiz oıyn bastala sala qarsylastaryn qyspaqqa alyp, birqatar shabýyl uıymdastyrdy. Nátıjesinde, 10-mınýtta Maksım Volkov kezdesýdegi alǵashqy shaıbany saldy. 14-mınýtta Ilıa Kovzalov esepti eseleı túskeni sol edi, bir mınýt ótpeı jatyp Konstantın Savenkov Qazaqstan quramasynyń úshinshi golyn soqty. Aspanasty eliniń hokkeıshileri de qarsy shabýylǵa shyǵyp, Sergeı Kýdrıasev qorǵaǵan qaqpany birneshe márte nysanaǵa alǵan. Biraq bári sátsiz aıaqtalyp jatty. Ekinshi kezeń de osy baǵytta órbidi. Jerlesterimiz «á» degennen-aq oıyn tizginin óz qoldaryna alyp, oraıy kelgen sátterdi tıimdi paıdalanýǵa tyrysty. Kezdesýdiń 23-mınýtynda Maksım Volkov dýbl ıesi atansa, 34-mınýtta Dmıtrıı Grens basymdyqty arttyra tústi. 37-mınýtta Konstantın Savenkov óziniń osy matchtaǵy ekinshi golyn saldy. Sońǵy 20 mınýtta otandastarymyz saýatty qorǵanyp, qarsy shabýyldarǵa jıi shyqty. 45-mınýtta Savenkov het-trık ıesi atansa, araǵa bes mınýt salyp Kırıll Savıskıı kezdesýdegi sońǵy shaıbany soqty. Aıta keteıik, Sergeı Starygın shákirtteri osymen ekinshi oıynda jeńiske jetip otyr. Buǵan deıin ońtústikkoreıalyqtardan 4:0 esebimen basym túsken. Al kelesi match 26 aqpan kúni Japonııa quramasymen ótedi.