Azıada-2017. Qazaqstan quramasy komandalyq esepte tórtinshi orynda keledi

Japonııanyń Sapporo qalasynda ótip jatqan VIII qysqy Azııa oıyndarynyń altynshy kúni aıaqtaldy. Osy ýaqyt aralyǵynda komandalyq esepte Japonııa quramasy 56 medalimen (19 altyn, 19 kúmis, 18 qola) kósh bastasa, ekinshi orynda Ońtústik Koreıa keledi. Olardyń enshisinde 14 altyn, 14 kúmis, 14 qola bar. Al úshtikti Qytaı quramasy túıindep tur. Aspanasty eliniń sportshylary alty kúnniń ishinde 9 altyn, 8 kúmis, 7 qola júlde jeńip aldy. Al Qazaqstan quramasy ázirge tórtinshi orynda keledi. Osy ýaqyt aralyǵynda jerlesterimiz barlyǵy 19 medalǵa qol jetkizdi. Onyń beseýi – altyn, altaýy – kúmis, segizi – qola. Aıta keteıik, búgin el qorjynyna bıatlonshylarymyzdan Iаn Savıskıı (12,5 shaqyrym) kúmis, Galına Vıshnevskaıa (10 shaqyrym) altyn, paralleldi mogýl jarysynda Iýlııa Galysheva altyn, frıstaılshy Dmıtrıı Reıherd juptyq mogýl jarysynda qola, shańǵy estafetasynda erlerimiz kúmis, shańǵymen tramplınnen sekirý jarysynda Marat Japparov qola medal saldy.