Qazaqstanda kóleńkeli ekonomıka kólemi IJО́-niń 20% kem emes

Kóleńkeli ekonomıkany azaıtý, qurylys barysyna monıtorıng júrgizýdi kúsheıtý, bıýdjet qarajatyn ońtaıly paıdalaný maqsatynda Qarjy mınıstrligi qurylys boıynsha memlekettik satyp alýlardy qazynashylyq súıemeldeýdi engizýdi usyndy. Bul týraly Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda qarjy mınıstri Baqyt Sultanov baıandady, dep jazady primeminister.kz. Mınıstrdiń aıtýynsha, ulttyq statıstıka organdarynyń resmı málimetteri boıynsha Qazaqstanda kóleńkeli ekonomıka kólemi IJО́-niń 20% kem emes. Onyń basty quraýshylarynyń biri memlekettik satyp alýlar kezinde jalǵan kásiporyndar arqyly qarajatty qolma-qol aqshaǵa aınaldyrý arqyly bıýdjet qarajatyn jumsaýmen baılanysty qylmystar bolyp tabylady. Mundaıda bólingen aqsha qarajatynyń úshten bir bóligi «qurylys» jáne «saýda» salalaryna tıesili. Bıýdjet zańnamasy men memlekettik satyp alýlar týraly zańdy buzýdyń basym úlesi qurylys salasyna tıesili. MKK málimetteri boıynsha 2016 jyly 380 qylmystyq istiń 115-i qurylys salasyna tıesili, bul 30,2% quraıdy. Joǵaryda atalǵan olqylyqtardy joıý maqsatynda qurylys boıynsha memlekettik satyp alýlardy qazynashylyq súıemeldeý engiziledi, bul tólemderdiń aıqyndyǵy, salyqtyń tolyq tólenýin, qurylys sapasyn baqylaýdy, bıýdjet qarajatyn maqsatty paıdalanýdy, qazaqstandyq quraýyshty baqylaýdy qamtamasyz etýge múmkindik beredi.   «Qurylys salasynda memlekettik satyp alýlardy qazynashylyq súıemeldeý tetigi memlekettik organdarmen, bıznes qaýymdastyǵymen halyqaralyq tájirıbeni jáne kvazımemlekettik jáne bank sektoryndaǵy esepshottardy baqylaýdyń qoldanystaǵy tetikterin talqylaýdy eskerýmen ázirlendi», - dep atap ótti B.Sultanov. Halyqaralyq tájirıbeni eskerýmen alǵash ret tájirıbege jobany basqaratyn sýpervaızerler (ınjınırıngtik kompanııalar) qyzmetteri tartylatyn bolady, olar qurylys sapasyn ǵana emes, barlyq shyǵyndardyń negizdi jumsalýyn qadaǵalaıdy. Bıyl bul tetik úsh aımaqta (Astana qalasynda, Aqmola jáne Qaraǵandy oblystarynda) aprobasııalanatyn bolady. Qazynashylyq súıemeldeýdi engizý boıynsha Jol kartasy bekitildi. Pılottyq jobany engizý qorytyndylary boıynsha qurylys salasynda memlekettik satyp alýlardy qazynashylyq súıemeldeýdi normatıvtik bekitý úshin QR zańnamasyna túzetýler pysyqtalatyn bolady, dep túıindedi sózin mınıstr. Eske salaıyq, Memleket basshysy ««Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýynda bıýdjet shyǵystarynyń tıimdiligin túbegeıli arttyrý negizgi mindetin qoıdy.