Koreıalyq kompanııa Qaraǵandy oblysynan polımetall barlaıdy

Qaraǵandyda «Atameken» QR KUP Isker áıelder keńesiniń jáne óńirlik kásipkerler palatasynyń bastamasymen bıznes-forým uıymdastyryldy. Forým barysynda aımaq basshysy Nurmuhambet Ábdibekov Qaraǵandy oblysy men Koreıa Respýblıkasynyń arasyndaǵy baılanys týraly aıtyp berdi, dep jazady abctv.kz.  «1994 jyly Qaraǵandy qalasy men Seýl qalasynyń Song Pa okrýgymen arasyndaǵy baýyrlastyq týraly kelisimge qol qoıyldy. 2010 jyly Qaraǵandy oblysynyń ákimdigi men Ýlsan metropolııasy saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi kelisim jasasty. 2015 jyly qazan aıynda Koreıa Respýblıkasynyń Tótenshe jáne ókiletti elshisi Cho Iongchon bastaǵan delegasııa Qaraǵandy oblysyna resmı saparmmen keldi», - dedi oblys ákimi. Qaraǵandy oblysynda Ońtústik Koreıanyń  qatysýymen 24 kásiporyn qurylǵan. Olar – taý-ken jáne óńdeý ónerkásibi, kóterme jáne bólshek saýda, kólik jáne qoıma, qurylys salasy, jatyn men tamaqtaný qyzmetteri, kásipqoı jáne ǵylymı-tehnıkalyq qyzmet, basqa da qyzmetter. «Qaraǵandy oblysynda Dúısembaı ýchaskesinde «Korea Resources Corporation» jáne «Qazgeologııa» AQ arasyndaǵy polımetalldy barlaý boıynsha birlesken joba júzege asyrylýda. 2015-2016 jyldary dalalyq, geologııalyq barlaý jumystary júrgizildi. Qazirgi kezde kameraldy jáne zerthana jumystary jalǵasýda», – dep habarlady aımaqqa saparlap kelgen Tegý qalasynyń delegasııasymen kezdesýde Nurmuhambet Ábdibekov. «Saryarqa» AEA aýmaǵynda Koreıa Respýblıkasymen qubyrlar men fasondyq buıymdar shyǵaratyn birlesken zaýyt jumys isteıdi, dep eske salyp ótti oblys basshysy. Aımaq ákimi qonaqtarǵa týrızm salasyndaǵy baılanystardy damytýdy usynyp, oǵan Tegý qalasynyń vıse-meri Kım Ion Chan yntymaqtastyqqa múddelik tanytty. Forým barysynda iskerlik qarym-qatynasty damytý týraly eki kelisimge qol qoıyldy.  2016 jyly Qaraǵandy oblysynyń Koreıa Respýblıkasymen syrtqy saýda aınalymy 9,7 mln AQSh dollaryn qurady (jalpy kólemniń 0,3%). Bul tek ımporttyń kólemi. Oblys Koreıadan býldozerler, ekskavatorlar, tıegishter men jol tegisteıtin katoktar; elektrodánekerleý mashınalary men apparattaryn; joný stanoktaryn; munaı jáne munaı ónimderin; metall ılemdeý ornaqtaryn jáne arqaýlar; temirden nemese qospasyz bolattan jasalǵan prokat; etılen polımerlerin; propılen polımerlerin; shyny-talshyqtar; plıtalar, plastmass tabaqtar; azyq-túlik ımporttaǵan.