Qazaqstanda jańa kólikter sany turaqty artyp keledi

Qazaqstanda kommersııalyq avtotehnıka parkiniń jańarýy bastaldy. Bul týraly II Qazaqstandyq halyqaralyq avtomobıl forýmynda «Astana Motors» kompanııasynyń marketıng jáne damý jónindegi dırektory Anar Maqesheva málim etti, dep habarlaıdy QazAqparat. «Jalpy, 2016 jyly tirkelgen kommersııalyq tehnıka avtomobılderiniń sany 100 myńnan asty. Bul ótken jyly tirkelgen jalpy kólemniń 13 paıyzyn quraıdy. Zańdy tulǵalarǵa qaıta tirkeý 30 paıyzdy qamtydy, al jeke tulǵalarǵa 70 paıyz tıesili boldy. Iаǵnı, buryn qoldanysta bolǵan avtomobılder de atalǵan statıstıkada eskerilgen. Tirkelgen kólikterdiń 54 paıyzdan astamy 10 jyldan asqan avtomobılderdi qamtydy. Sonymen qatar, 3 jylǵa deıingi kólikterdiń úlesi 15 paıyzǵa jetkendigi qýantarlyq jaǵdaı. Bul óz kezeginde park birtindep jańaryp kele jatqandyǵyn baıqatady. Osy oraıda aldaǵy 10 jylda parkti jańartýǵa baǵyttalǵan strategııa júzege asyrylady degen úmittemiz»,-dedi A. Maqasheva. Belgili bolǵandaı, qazirgi kezde Qazaqstanda kommersııalyq avtotehnıkanyń 80 paıyzy 10 jyldan asqan avtomashınalardy qurap otyr. Qoldanys merzimi 3 jylǵa deıingi kólikterdiń úlesi tek qana 3 paıyz. Degenmen, jańa avtomobılderdi tirkeý deńgeıi artyp kele jatqanyn eskere otyryp, parktiń jańarýy úrdisi joǵarylaı túsetinin atap ótýge bolady. Kommersııalyq avtotehnıka qataryna avtobýstar, júk kólikteri, jartylaı tirkemeler, bortty platformalar, fýrgondar, evakýatorlar, avtosısternalar jáne arnaıy tehnıka kiredi.