Qazaqstanda bankter nesıe berýdi azaıtty

Qazaqstanda nesıege suranys azaıdy. Oǵan sebep ótken jyldyń sońynda bankterdiń nesıe sharttaryn qatańdatqany. Aldaǵy ýaqytta nesıe sharttary tipti kúsheıýi múmkin. Bul týraly QR Ulttyq bankiniń kezekti saraptamalyq esebinde aıtyldy. "2017 jyldyń birinshi maýsymynda qatań nesıe saıasaty saqtalady. Iskerlik belsendiliktiń maýsymdyq báseńdeýi aıasynda nesıege degen suranys ta tómendemek. Nátıjesinde nesıe berýshilerdiń jumysy da báseńdeıdi", delingen zertteýde. Sarapshylardyń pikirinshe, 2016 jyldyń tórtinshi toqsanynda ekinshi deńgeıli bankter (EDB) tutyný jáne ıpotekalyq nesıeniń maksımaldy kólemin azaıtyp, paıyzdyq mólsherlemesin kóbeıte otyryp nesıe saıasatyn kúsheıtti. Oǵan qosa halyqtyń tólem qabiletine degen talaptary da kúsheıtildi. Buǵan sebep bolǵan Ulttyq banktiń EDB-ge qarsy ustanǵan saıasaty. Nesıe saıasatyn qatańdatýdy toqtatýshy faktor retinde jyljymaıtyn múlik baǵasynyń tómendeýi boldy. Sonymen qatar kepilzat qoıýǵa da halyq qulyqty bolmady. Qarjy salasynyń qyzmetkerlerine júrgizilgen saýalnamaǵa qatysýshylar aldaǵy ýaqytta jyljymaıtyn múlik pen kommersııalyq nysan naryǵynyń álsireıtinin boljaıdy. Respondentterdiń 34 paıyzy aldaǵy ýaqytta páter men úı baǵasynyń azdap arzandaıtynyn aıtady. Sonymen qatar EDB ókilderiniń 24 paıyzy iskerlik nysandardyń baǵasy kóp zardap shegetinin alǵa tartady. Al bankterdiń osyǵan qaramastan paıyzdyq mólsherlemelerin azaıtady dep kútýge bolmaıdy. Kópshilik respondentter aldaǵy ýaqytta bank osy mólsherlemeni saqtaıtynyn aıtady. Jalpy, bankterdiń 17 paıyzy aldaǵy ýaqytta halyqtyń materıaldyq jaǵdaıynyń tómendeıtinin boljasa, 14 paıyz jaǵdaıda nesıeni ýaqyty tóleı almaýy múmkin ekenin aıtady. Jalpy, ishki jáne syrtqy faktolrlardy eskere otyryp, aldaǵy ýaqytta bankterdiń paıyzdyq ústemesiniń azaıtylýy múmkin emestigi aıtylýda.