Elsııar Qanaǵatov: Sportshylarymyz múmkindikterin tolyq paıdalandy

Ortalyq kommýnıkasııalar qyzmetinde Mádenıet jáne sport mınıstrligi sport jáne dene shynyqtyrý isteri komıtetiniń  tóraǵasy Elsııar Qanaǵatov Qazaqstan sportshylarynyń VIII qysqy Azııa oıyndaryndaǵy nátıjeleriniń qorytyndysyn shyǵardy. «Bıylǵy Azııa oıyndary Japonııanyń Sapporo men Hokkaıdo aralynda ornalasqan Obıhıro qalasynda ótti. Oǵan jer-júziniń otyzdan astam eliniń sportshylary qatysty», – dep bastady sózin Elsııar Baımuhameduly. Odan ári komıtet tóraǵasy sporttyń 11 túrinen 64 medal jıyntyǵy sarapqa salynǵan Oıyndarda otandastarymyzdyń sátti óner kórsetkenin, jarysta Qazaqstan sportshylary 9 altyn, 11 kúmis jáne 12 qola medal jeńip alǵanyn aıtty. Onyń aıtýynsha, buǵan deıin sportshylarymyz bes Azııa oıyndaryna qatysyp, barlyǵy 69 altyn, 51 kúmis jáne 44 qola júlde ıelengen. Al 2011 jyly Astana men Almatyda ótken synda sańlaqtarymyz 32 altyn, 21 kúmis jáne 17 qola medaldi mise tutty. Bıylǵy Azıadada Qazaqstan quramasy taǵy da aldyna Japonııa, Ońtústik Koreıa men Qytaıdy jiberip, tórtinshi oryndy qanaǵat tutty. «Kúnshyǵys elinde bizdiń sportshylarymyz qysqy sporty jaqsy damyǵan Japonııa, Koreıa jáne Qytaıdyń qyz-jigitterimen ıyq teńestirip básekelesti. Olar Azıadada barlyq jarystarǵa qatysty. Ásirese, bıatlon, mogýl, hokkeı men shańǵy jarysynda chempıon atanǵan sportshylarǵa rızamyz. Solardyń arqasynda kók baıraǵymyz toǵyz ret jelbirep, ánuranymyz oınaldy. Mysaly, Galına Vıshnevskaıanyń bir ózi bıatlonda tórt ret qurmet tuǵyrynyń eń bıik satysyna kóterildi. Al Iаn  Savıskıı bolsa úsh ret altyn júldeni alyp, eki ret kúmis medalmen kúpteldi. Darıa Ýsanova da qalpaqpen uryp alatyn qarsylas emestigin kórsetti. Sol sııaqty mogýlda Iýlııa Galysheva, shańǵyda Rınat Mýhın, Elena Kolomınanyń, konkımen jarysýda Denıs Kýzınniń eńbegin atap ótý kerek», – dedi ol. Jalpy, Elsııar Qanaǵatovtyń aıtýynsha, Azıadada sportshylarymyz múmkin bolǵan jaǵdaıdyń bárin jasap, qolda turǵan júldelerdi qarsylastarynyń qanjyǵasyna baılap bermeýge tyrysty. «Azıadaǵa bizdiń keıbir myqty degen sportshylarymyz qatysa almady. Olar álemniń túkpir-túkpirinde ótip jatqan halyqaralyq týrnırler men álem chempıonattaryna qatysyp jatyr. Keıbireýi kelesi jyly Ońtústik Koreıada ótetin Qysqy Olımpadaǵa daıyndalýda. Degenmen, qysqy sportty serik etken qyz-jigitterimiz elimizdiń namysyn qoldan bermeýge tyrysyp, Japonııadan júldeniń túr-túrin arqalap ákeldi. Endi olar Úkimettiń tıisti qaýlysymen aqshalaı syıaqy alyp, marapattalady. Qazaq qysqy sportynyń bolashaǵy zor. Qazir elimizdiń jer-jerinde shańǵy, mogýl, bıatlon, konkı men hokkeı sııaqty sport túrlerin jaqsy damyp keledi. Eger buryn qysqy sport soltústik pen shyǵys óńirlerde qanatyn keń jaıǵan bolsa, búginde ońtústik oblystarda aıaǵyna konkı kıip, qolyna hokkeı taıaǵyn ustaǵan jastardy jıi kórýge bolady. Bul túptep kelgende qazaq sportynyń bolashaǵy zor degen sóz. Osyndaı sportqa ıkemdi, ony jan-tánimen súıip, serik etken qyz-jigitterimiz bolsa Qazaqstannyń kók baıraǵy áli talaı Azıadalarda bıikten kórinedi dep oılaımyn, – dedi ol. Dastan KENJALIN, «Egemen Qazaqstan»