2016 jyly Ońtústik Qazaqstanda 300 mlrd teńge salyq óndirilgen

Ońtústik Qazaqstan oblysynda ótken jyly 300 mlrd teńgeden asa salyq óndirilgen. О́ńirlik Memlekettik kirister departamenti basshylyǵynyń sózinshe bul soma bekitilgen jospardan 11 mlrd teńge artyǵymen qamtamasyz etilgenin kórsetedi, dep habarlaıdy QazAqparat. Departament basshysynyń orynbasary Ǵalymjan Orynovtyń sózinshe, búginde óńirde 325 myńnan astam adam 211 myń shaǵyn jáne orta bızneste jumys atqarady. 2016 jyly oblys bıýdjetine bıznes ókilderinen 150 mlrd. teńge túsken. «Bıýdjet túsimderin tolyq jáne ýaqtyly túsýin qamtamasyz etý boıynsha bekitilgen jospar 104 paıyzǵa qamtamasyz etildi. Naqty aıtqanda, bekitilgen jospar 291 mlrd. 197 mln. teńge bolsa, bıýdjetke 302 mlrd. 920 mln. teńge óndirilip, artyǵymen 11 mlrd. 724 mln. teńge tústi. О́tken jylmen salystyrǵanda, ósý qarqyny 126% nemese 62 mlrd. 288 mln. teńgege ósken»,- dedi Ǵalymjan Orynov. Al respýblıkalyq bıýdjettiń jospary 189 mlrd. 803 mln. teńge bolsa, naqty 196 mlrd. 915 mln. teńge óndirilipti. Keden salasynda atqarylyp jatqan jumystar boıynsha baıandaǵan departament basshysynyń orynbasary Nurjan Teńlibaevtyń aıtýynsha, oblystyń syrtqy taýar aınalymy 1 mlrd. 763 mln. AQSh dollaryn quraǵan. Kedendik tólemder men salyqtar 19,6 mlrd. teńgege nemese 58 paıyzǵa ósipti. Búgingi kúni, memlekettik qyzmettiń sapasyn arttyrý úshin, oblystyń 18 aýdany men qalalarynda 26 aqparatty qabyldaý, óńdeý jáne berý ortalyqtary ornalasqan. Memlekettik kirister organdarymen barlyǵy 53 qyzmet túri kórsetiledi. Sondaı-aq, kóleńkeli bıznespen kúres barysynda departament qyzmetkerleri  kóptegen kásipkerler quıtyrqylyq áreketterge baryp jatatyndyǵyn aıtady. Máselen, jeke kompanııalaryn  bóten adamdardyń attaryna tirkep qoıady. Olardyń qatarynda stýdentter, qarttar men úısiz júrgen azamattar bar eken.