Ońtústik Qazaqstanda shaǵyn jáne orta bıznesten qazynaǵa 150 mlrd teńge tústi

Ońtústik Qazaqstan oblysynda shaǵyn jáne orta bıznesten qazynaǵa 150 mlrd teńge tústi. Bul týraly О́ńirlik kommýnıkasııa qyzmetinde ótken brıfıngte OQO boıynsha Memlekettik kirister departamenti basshysynyń orynbasary Ǵalymjan Orynov málim etti, dep habarlaıdy oblys ákimdiginiń baspasóz qyzmeti. Onyń aıtýynsha, oblystaǵy 211 myń shaǵyn jáne orta bıznes ókilderinen qazynaǵa ótken jyly 150 mlrd teńge tústi. Bul 2015 jylmen salystyrǵanda 9,8 mlrd teńgege artyq. «Bizdiń salanyń negizgi qyzmetine qatysty tapsyrmanyń taǵy biri – ol bıznes ortany túbegeıli jaqsartý, oǵan ońtaıly jaǵdaı jasaý jáne keńeıtý. Osy rette, jeke kásipkerlerdiń memlekettik organdarǵa usynylatyn qujattardyń sany 7-den 4-ke deıin qysqartyldy. Bıýdjettik synyptamanyń 208 kodynan (BSK) 119–ǵa (57,2%), qosymsha qun salyǵyn qaıtarý merzimderi 180 kúnnen 155 kúntizbelik kúnge deıin qysqartyldy», –– dedi departament basshysynyń orynbasary. Brıfıngte málim bolǵandaı, 2016 jyly oblysymyzdyń syrtqy taýar aınalymy 1 mlrd 763 mln AQSh dollardy quraǵan. Al kedendik tólemder men salyqtardan bıýdjetke 53 mlrd 500 mln teńge kóleminde qarjy túsken. Bul 2015 jylǵymen salystyrǵanda 19,6 mlrd teńgege nemese 58% ósken. Sonymen qatar, ótken jyly memlekettik kirister departamenti tarapynan halyqqa 1,7 mln memlekettik qyzmet kórsetildi. Onyń ishinde, qyzmettiń 1,4 mln nemese 81% elektrondy túrde, al elektrondy úkimet veb-portaly arqyly 11 myńnan astam qyzmet kórsetildi. Bul Elbasy Joldaýynda aıtylǵan sıfrlyq ındýstrııany, ıaǵnı, IT salasyn damytý tapsyrmasyn atalǵan departament búginde nátıjeli júzege asyrýynyń aıǵaǵy.