"Egemen Qazaqstan" gazetiniń tańdaýly maqalalary basylymnyń júz jyldyǵyna oraı on tomdyq jınaq bolyp jaryq kóredi. Bul týraly búgin gazet qolǵa alǵan jobalardy tanystyrý barysynda habarlandy. On tomdyq jobasyna qatysýshylardyń biri Namazaly Omashuly zertteý jumystaryn jasaı júrip "Egemen Qazaqstannyń" arhıvin úsh ret qarap shyqqanyn aıtty.
"Ol nómirler tórt jerde saqtaýly. Biraz betteri joǵalǵan, qıylǵan. Al endi sol arhıv elektrondy formatqa kóshirilse nemese ol arhıv on tomdyq kitap bolyp shyqsa, zertteýshiler úshin baǵa jetpes syılyq bolǵaly tur. О́ıtkeni, "Egemen Qazaqstannyń" arhıvi óte baı. Onyń bir bóligi tóte jazý nusqasynda, olardy kırıllısaǵa kóshirý qajet", dedi Namazaly Omashuly. Jınaqtyń alǵashqy alty tom kelesi jyly shyǵady, al basylymnyń 100 jyldyǵyna qaraı on tomdyq tolyǵymen oqyrman nazaryna usynylmaq.
Osyǵan oraı pikir bildirgen Sultan Orazaly buryn zertteý júrgizý barysynda ǵalymdar tóte jazýdan kırılısaǵa aýdarýǵa óte kóp ýaqyt jumsaǵanyn aıtty. "Al qazir izdengen adamǵa bul on tomdyq óte úlken kómek bolady, ári ǵylymı jumystardy jeńildetedi. Sebebi, tóte jazýdan aýdarylyp basylady", dedi ol.
Joba jetekshisi Darhan Qydyráli "Júz jylǵy gazet nómirlerin on tomǵa syıǵyzý qıyn jáne barlyq materıaldardy kitapqa kirgizýge qajettilik te joq. Sondyqtan ol materıaldardyń ishindegi mańyzdylary tańdalady", dedi basylym basshysy.
